பரந்தூர் விமான நிலைய அறிவிப்பு! திமுக உறுப்பினர்கள் வெளிநடப்பு

தமிழக சட்டப்பேரவையில் பேசிய முதல்வர் விஜய், பரந்தூர் விமான நிலையம் கைவிடப்படும் என அறிவித்ததற்கு எதிர்ப்பு தெரிவித்து திமுக உறுப்பினர்கள் பேரவையிலிருந்து வெளிநடப்பு செய்தனர்.

தமிழக சட்டப்பேரவையில் இன்று பேரவை விதி எண் 110-ன் கீழ் பேசிய முதல்வர் விஜய், விவசாய நிலங்கள் மற்றும் மக்கள் பாதிக்கப்படும் வகையில் அமையவிருந்த பரந்தூர் விமான நிலைய திட்டம் இந்த அரசால் கைவிடப்படும் என்று அறிவித்தார்.

அப்போது, இந்த அறிவிப்புக்கு எதிர்ப்பு தெரிவித்து திமுக உறுப்பினர்கள் கோஷங்கள் எழுப்பினர். மேலும், பரந்தூர் விமான நிலைய விவகாரம் குறித்து பேச அனுமதிக்க வேண்டும் என்று திமுக உறுப்பினர்கள் அவைத் தலைவருக்கு கோரிக்கை வைத்தனர்.

ஆனால், முதல்வர் விஜய், பேரவை விதி 110-ன் கீழ் இந்த அறிவிப்புகளை வெளியிட்டதால், அது குறித்து பேச திமுகவினருக்கு அனுமதி அளிக்க முடியாது என்று அவைத் தலைவர் கூறிவிட்டார்.

இதனை எதிர்த்து திமுக உறுப்பினர்கள் எழுந்து நின்று அவையில் கோஷமிட்டனர். எனவே, அனைவரும் வெளியே சென்று கோஷமிடுங்கள் என அவைத் தலைவர் ஜே.சி.டி. பிரபாகர் கூறினார். இதனால், திமுக உறுப்பினர்கள் பேரவையிலிருந்து வெளிநடப்பு செய்தனர். அப்போது அவர்கள் அனுமதி கொடு, அனுமதி கொடு என கோஷம் எழுப்பியவாறு வெளியே சென்றனர்.

முன்னதாக, விவசாய நிலங்கள் மற்றும் மக்கள் வாழும் குடியிருப்புகள் அதிகம் பாதிக்கப்படும் இடத்தில் பரந்தூர் விமான நிலையம் அமையவிருந்ததால் அந்த நடவடிக்கை கைவிடப்படும், மாற்று இடம் தேர்வு செய்யப்பட்டு இரண்டாவது விமான நிலையம் அமைக்கப்படும், சென்னை மீனம்பாக்கம் விமான நிலையம் விரிவுபடுத்தப்படும் என்று முதல்வர் விஜய் பேரவையில் அறிவித்திருந்தார்.