ஆடும் லெவன் அறிவித்த இங்கிலாந்து: வியூகம் குறித்து ஜோ ரூட் விளக்கம்

இந்தியாவுடனான முதல் டெஸ்ட் போட்டிக்கான இங்கிலாந்து ஆடும் லெவன் அணி செவ்வாய்கிழமை அறிவிக்கப்பட்டது.

இந்தியா, இங்கிலாந்து அணிகளுக்கு இடையிலான 5 போட்டிகள் கொண்ட டெஸ்ட் தொடர் நடைபெறவுள்ளது. இதில் ஆகஸ்டு 1-ஆம் தேதி தொடங்கி பார்மிங்காமில் நடைபெறும் முதல் டெஸ்ட் போட்டிக்கான இங்கிலாந்து அணியின் ஆடும் லெவன் அறிவிக்கப்பட்டுள்ளது. இதில் டெஸ்ட் போட்டிக்கு மீண்டும் அழைக்கப்பட்டுள்ள சுழற்பந்துவீச்சாளர் ஆதில் ரஷித் இடம்பிடித்துள்ளார்.

சமீபத்தில் இந்தியாவுக்கு எதிரான ஒருநாள் தொடரில் சிறப்பாக பந்துவீசியதன் எதிரொலியாக அவர் இங்கிலாந்து டெஸ்ட் அணிக்கு மீண்டும் அழைக்கப்பட்டுள்ளார். ஏனெனில் அவர் ஏற்கனவே டெஸ்ட் போட்டிகளில் இருந்து ஓய்வு பெற்றிருந்தது குறிப்பிடத்தக்கது. அதுபோல ஒருநாள் போட்டிகளில் தொடர்ந்து சிறப்பான ஆட்டத்திறனுடன் விளங்கி வரும் ஜாஸ் பட்லர் புதிய துணைக் கேப்டனாக தேர்வு செய்யப்பட்டுள்ளார்.

இந்தியாவுடனான டெஸ்ட் தொடர் குறித்து இங்கிலாந்து கேப்டன் ஜோ ரூட், செய்தியாளர்கள் சந்திப்பில் கூறியதாவது:

இந்திய அணியில் உள்ள வலதுகை பேட்ஸ்மேன்களின் எண்ணிக்கையை கருத்தில் கொண்டு ஆதில் ரஷித் தேர்வு செய்யப்பட்டுள்ளார். மேலும் சமீபகால ஆட்டங்களில் அவர் சிறப்பாக செயல்பட்டு நம்பிக்கையுடன் உள்ளார். ஆதில் ரஷிதை எனக்கு நீண்ட காலமாக தெரியும். அவ்வகையில் அவர் கடந்த 2 ஆண்டுகளில் கிரிக்கெட் வீரராக முழுமைப் பெற்றுள்ளார் என்று கருதுகிறேன். அவரது செயல்பாடுகள் குறித்து நன்கு அறிந்து வைத்துள்ளார்.

அதுபோல ஒருநாள் தொடர்களில் துணைக் கேப்டனாக செயல்பட்ட ஜாஸ் பட்லர், இங்கிலாந்து அணியில் போற்றுதலுக்குரிய வீரர். மேலும் டெஸ்ட் கிரிக்கெட்டை அவர் அதிகம் நேசிப்பவர். மேலும் இங்கிலாந்து அணிக்கு நீண்டகால அடிப்படையில் துணைக் கேப்டனை தேர்வு செய்ய நினைத்தோம். எனவே அதற்கு ஜாஸ் பட்லர் சரியான தேர்வாக இருந்ததாக தெரிவித்துள்ளார்.

முதல் டெஸ்ட் போட்டிக்கான இங்கிலாந்து அணியின் ஆடும் லெவன்:

ஆலஸ்டைர் கூக், கீட்டன் ஜென்னிங்ஸ், ஜோ ரூட் (கேப்டன்), டேவிட் மாலன், ஜானி பேர்ஸ்டோ (விக்கெட் கீப்பர்), பென் ஸ்டோக்ஸ், ஜாஸ் பட்லர், சாம் கர்ரன், ஆதில் ரஷித், ஸ்டூவர்ட் பிராட், ஜேம்ஸ் ஆண்டர்சன்.