உலக டெஸ்ட் சாம்பியன்ஷிப் இறுதிப்போட்டியை நெருங்கும் ஆஸ்திரேலியா!

உலக டெஸ்ட் சாம்பியன்ஷிப் கோப்பையில் முன்னாள் சாம்பியனான ஆஸ்திரேலிய அணி இறுதிப்போட்டிக்கு வேகமாக முன்னேறி வருகிறது.

ஆஸ்திரேலியாவில் சுற்றுப்பயணம் மேற்கொண்ட வங்கதேச அணி இரண்டு போட்டிகள் கொண்ட டெஸ்ட் தொடரில் விளையாடியது. முதல் போட்டியில் 9 விக்கெட்டுகள் வித்தியாசத்தில் ஆஸ்திரேலிய அணிக்கு அதிர்ச்சியளித்த வங்கதேச அணி, இரண்டாவது போட்டியில் விளையாடியது.

மெக்கேவில் உள்ள கிரேட் பேரியர்ஸ் ரீஃப் கிரிக்கெட் திடலில் நேற்று (ஆக. 22) தொடங்கிய இந்த ஆட்டத்தில் முதலில் பேட் செய்த வங்கதேச அணி 34 ஓவர்களில் 64 ரன்களுக்கு ஆட்டமிழந்தது. தொடர்ந்து ஆடிய ஆஸ்திரேலிய அணி முதல் இன்னிங்ஸில் 210 ரன்கள் எடுத்து ஆல்-அவுட் ஆனது.

முதல் இன்னிங்ஸில் 146 ரன்கள் பின்தங்கிய நிலையில் இரண்டாவது இன்னிங்ஸை தொடங்கிய வங்கதேச அணியை, மிட்செல் ஸ்டார்க் மீண்டும் மிரட்டினார்.

வங்கதேச அணி இரண்டாவது இன்னிங்ஸில் 36.3 ஓவர்களில் 95 ரன்கள் எடுத்து சுருண்டது. இதன் மூலம் இன்னிங்ஸ் மற்றும் 51 ரன்களில் ஆஸ்திரேலியா வெற்றி பெற்றது. முதல் இன்னிங்ஸில் 6 விக்கெட்டுகள், இரண்டாவது இன்னிங்ஸில் 4 விக்கெட்டுகள் என மொத்தமாக 10 விக்கெட்டுகளைக் கைப்பற்றிய மிட்செல் ஸ்டார்க் ஆட்டநாயகனாகத் தேர்வு செய்யப்பட்டார்.

முதல் போட்டியில் தோல்வியடைந்திருந்த ஆஸ்திரேலிய அணி, வங்கதேசத்துக்கு அதிர்ச்சியைக் கொடுத்து 1-1 என்ற கணக்கில் தொடரையும் சமன் செய்தது. இந்த வெற்றியின் மூலம், உலக டெஸ்ட் சாம்பியன்ஷிப் தொடரில் இறுதிப்போட்டிக்கு வேகமாக முன்னேறி வருகிறது.

உலக டெஸ்ட் சாம்பியன்ஷிப் புள்ளிப்பட்டியலில், 10 போட்டிகளில் 8 வெற்றி, 2 தோல்வியுடன் 80.00 சதவிகிதத்துடன் முதலிடத்தைப் பிடித்திருக்கும் ஆஸ்திரேலிய அணி வங்கதேச தொடருக்கு முன்னதாக 6 வெற்றிகள் தேவைப்பட்டன. அதில், வங்கதேசத்துக்கு எதிராக ஒரு போட்டியில் வெற்றிபெற்றிருக்கிறது. ஆஸ்திரேலிய அணிக்கு இன்னும், தென்னாப்பிரிக்கா, இந்தியா, நியூசிலாந்து ஆகிய நாடுகளுக்கு எதிராக 12 போட்டிகளில் விளையாடவிருக்கிறது.

இந்தியாவுக்கு எதிராக மட்டும் 5 போட்டிகள் கொண்ட பார்டர் - கவாஸ்கர் தொடரில் விளையாடவிருக்கிறது. மொத்தமுள்ள 12 போட்டிகளில் 5-ல் வெற்றி பெற்றால் மட்டுமே ஆஸ்திரேலிய அணி இறுதிப்போட்டிக்குத் தகுதிபெற்றுவிடும். இந்திய மண்ணில் கடைசியாக விளையாடியுள்ள 12 போட்டிகளில் வெறும் 2 போட்டிகளில் மட்டுமே ஆஸ்திரேலிய அணி வெற்றிபெற்றிருப்பதால் இந்தத் தொடர் இரண்டு அணிகளுக்கும் சவாலாக இருக்கும் என்று எதிர்பார்க்கப்படுகிறது.