சமீர் ரிஸ்வி அதிரடியில் தில்லி கேபிடல்ஸ் வெற்றி!

ஐபிஎல் கிரிக்கெட் 2026 தொடரில் இன்றைய ஆட்டத்தில் தில்லி கேபிடல்ஸ் வெற்றி பெற்றது.

லக்னௌ அணிக்கு எதிராக தில்லி கேபிடல்ஸ் அணி டாஸ் வென்று பந்துவீச்சைத் தேர்வு செய்து சிறப்பாக பந்துவீசியது. லக்னௌ சூப்பர் ஜெயண்ட்ஸ் 18.4 ஓவர்களில் 141 ரன்களுக்கு ஆட்டமிழந்தது. தில்லி கேபிடல்ஸ் அணியில் தமிழக வீரர் நடராஜன், தென்னாப்பிரிக்க வீரர் லுங்கி இங்கிடி தலா 3 விக்கெட்களை சாய்த்தனர்.

அடுத்து, 142 ரன்கள் இலக்குடன் தில்லி கேபிடல்ஸ் பேட்டிங் செய்தது. அந்த அணியும் அடுத்தடுத்து விக்கெட்களைப் பறிகொடுத்து ரன் திரட்ட தடுமாறியதால் ஆட்டம் பரபரப்பாகச் சென்றது.

முதல் 10 ஓவர்கள் திணறினாலும் தில்லி கேபிடல்ஸ் அணியில் சுதாரித்து விளையாடிய சமீர் ரிஸ்வியும் ட்ரிஸ்டன் ஸ்டப்ஸும் அணியை வெற்றி பாதைக்கு இட்டுச் சென்றனர். 4 விக்கெட்களை இழந்து 17.1 ஓவர்களில் 145 ரன்கள் எடுத்து 6 விக்கெட் வித்தியாசத்தில் வெற்றி பெற்றது.

சமீர் ரிஸ்வி 47 பந்துகளில் 70 ரன்கள் (5 பௌண்டரிகள், 4 சிக்ஸர்கள்) குவித்து கடைசி வரை ஆட்டமிழக்காமல் இருந்து ஆட்டநாயகன் விருதையும் தட்டிச் சென்றார்..