யு.எஸ். ஓபன்: 17-வது கிராண்ட்ஸ்லாம் பட்டத்தை வென்றார் லியாண்டர் பயஸ்!

இந்த ஆண்டின் கடைசி கிராண்ட் ஸ்லாம் போட்டியான யு.எஸ். ஓபன் டென்னிஸ் தொடர் அமெரிக்காவின் நியூயார்க் நகரில் நடைபெற்று வருகிறது. இதில் கலப்பு இரட்டையர் பிரிவு இறுதிப் போட்டியில் இந்தியாவின் லியாண்டர் பயஸ் - மார்ட்டினா ஹிங்கிஸ் ஜோடி, அமெரிக்காவின் பெதானி மட்டெக் சான்ட்ஸ் - சாம் கியூரெரே ஜோடியுடன் மோதியது.

 6-4, 3-6, 10-7 என லியாண்டர் ஜோடி இறுதிப் போட்டியை வென்றது. இந்த ஆட்டம் 1 மணி நேரம் 17 நிமிடங்கள் நடந்தது.

பயஸ் - ஹிங்கிஸ் ஜோடி வெல்லும் மூன்றாவது கிராண்ட்ஸ்லாம் பட்டம் இது. இதற்கு முன்பு ஆஸ்திரேலிய ஓபன் மற்றும் விம்பிள்டன் பட்டங்களை இந்த ஜோடி வென்றுள்ளது.

இது லியாண்டர் பயஸ் வெல்லும் 17-வது கிராண்ட்ஸ்லாம் பட்டம் ஆகும். எட்டு ஆடவர் இரட்டையர் பட்டங்கள் மற்றும் 9 கலப்பு இரட்டையர் பட்டங்களை பயஸ் வென்றுள்ளார். 

இறுதிப் போட்டியில் ஃபெடரர் - ஜோகோவிச்

யு.எஸ். ஓபன் ஆடவர் ஒற்றையர் இறுதிப் போட்டியில் ஃபெடரரும் ஜோகோவிச்சும் மோதவுள்ளார்கள்.

அரையிறுதியில் ஃபெடரர், வாவ்ரிங்காவை 6-4, 6-3, 6-1 என நேர் செட்களில் வென்றார். மற்றொரு அரையிறுதிப் போட்டியில், ஜோகோவிச், மரின் சிலிச்சை 6-0, 6-1, 6-2 என நேர் செட்களில் எளிதாக வென்றார்.