தோனி இல்லாத ஐபிஎல்-லை நினைத்துக்கூடப் பார்க்கமுடியவில்லை: கவலைப்படும் சுனில் கவாஸ்கர்

முன்னாள் நீதிபதி லோதா, ஐபிஎல் சூதாட்டப் புகார் தொடர்பாக இன்று தீர்ப்பு கூறியதை அடுத்து சென்னை, ராஜஸ்தான் அணி வீரர்களின் நிலைமை கேள்விக்குறியாகியுள்ளது. சென்னை அணி வீரர்கள் எந்த அணியில் அடுத்த ஐபிஎல்-லில் ஆடுவார்கள் என்று சென்னை ரசிகர்கள் பலரும் சமூக வலைத்தளங்களில் கேள்வி எழுப்பி வருகிறார்கள்.

இந்த நிலையில், லோதாவின் தீர்ப்பு குறித்து கவாஸ்கர் கூறும்போது:

தோனிக்கு இப்போது 34 வயது. இன்னும் சில வருடங்களில் சர்வதேச கிரிக்கெட்டில் இருந்து ஓய்வு பெற்றுவிடுவார். அதனால் அவர் இல்லாத ஐபிஎல்-ஐ நினைத்துக்கூட பார்க்கமுடியவில்லை. சென்னை மற்றும் ராஜஸ்தான் அணி வீரர்கள் மிகவும் சங்கடத்துடன் இருப்பார்கள். ஏனெனில் அவர்கள் எந்தத் தவறும் செய்யவில்லை என்பதால். ஏற்கெனவே 3-4 வீரர்களுக்கு இடைக்காலத் தடை விதிக்கப்பட்டுள்ளதால், அவர்கள் கவலையுடன் இருப்பார்கள். அதேசமயம் மதிப்புமிக்க நீதிபதிகளின் தீர்ப்பை யாரும் கேள்விக்கு உட்படுத்த முடியாது.

அடுத்த ஐபிஎல் ஆரம்பிக்க இன்னும் 8 மாதங்கள் உள்ளன. எனவே 2 புதிய அணிகளைச் சேர்க்க பிசிசிஐக்கு கஷ்டம் எதுவும் இருக்காது. இந்திய கிரிக்கெட்டின் இந்த நிலைமைக்கு ஐபிஎல்-ஐ காரணம் சொல்லமுடியாது. ஐபிஎல்-லால் இந்திய வீரர்களுக்கு நிறைய நன்மைகள் கிடைத்துள்ளன என்றார்.