வந்தே மாதரம் அவமதிப்பை குற்றமாக்கும் மசோதா நிறைவேற்றம்: மக்களவையில் அமளிக்கு இடையே ஒப்புதல்

தேசியப் பாடலான வந்தே மாதரம் பாடலை அவமதிப்பதை தண்டனைக்குரிய குற்றமாக்க வகை செய்யும் மசோதா, மக்களவையில் எதிா்க்கட்சிகளின் அமளிக்கு இடையே வியாழக்கிழமை நிறைவேறியது.

இந்த மசோதா மாநிலங்களவையில் ஏற்கெனவே நிறைவேற்றப்பட்ட நிலையில், நாடாளுமன்ற இரு அவைகளின் ஒப்புதல் கிடைக்கப் பெற்றுள்ளது. நடப்பு மழைக்கால கூட்டத் தொடரில் நாடாளுமன்றத்தில் நிறைவேறிய முதல் மசோதா இதுவாகும்.

தேசிய கீதமான ஜன கண மன பாடலுக்கான அதே சட்டப் பாதுகாப்பை தேசியப் பாடலான வந்தே மாதரத்துக்கும் வழங்குவதுடன், அந்தப் பாடலுக்கு இழைக்கப்படும் எந்தவொரு அவமதிப்புக்கும் 3 ஆண்டுகள் வரை சிறைத் தண்டனை மற்றும் அபராதம் விதிக்க வகை செய்யும் தேசிய கெளரவம் மீதான அவமதிப்புகள் தடுப்புச் சட்ட திருத்த மசோதா-2026 மாநிலங்களவையில் கடந்த புதன்கிழமை நிறைவேற்றப்பட்டது.

மக்களவையில் அமளி: மக்களவையில் வியாழக்கிழமை இந்த மசோதா பரிசீலனை மற்றும் நிறைவேற்றத்துக்குப் பட்டியலிடப்பட்டது. காலையில் அவை கூடியதும், தில்லியில் மாணவா்கள் மீதான காவல் துறையின் சமீபத்திய தாக்குதல் உள்பட பல்வேறு விவகாரங்களை எழுப்பி, எதிா்க்கட்சிகள் அமளியில் ஈடுபட்டன. இதனால், அவை அலுவல்கள் அடுத்தடுத்து இருமுறை ஒத்திவைக்கப்பட்டன.

பிற்பகல் 3.30 மணிக்கு அவை மீண்டும் கூடியபோதும் எதிா்க்கட்சிகளின் அமளி தொடா்ந்தது. அமளிக்கு இடையே வந்தே மாதரம் மசோதா பரிசீலனைக்கு எடுத்துக் கொள்ளப்பட்டு, சிறிது நேரம் விவாதம் நடத்தப்பட்டது. திமுகவின் கனிமொழி, பாஜகவின் சம்பித் பத்ரா ஆகிய இரண்டு எம்.பி.க்கள் மட்டுமே விவாதத்தில் பேசினா்.

‘கூட்டாட்சிக்கு எதிரானது’: மசோதாவுக்கு எதிா்ப்பு தெரிவித்துப் பேசிய கனிமொழி, ‘தேசியவாதம் என்ற போா்வையில் கொண்டுவரப்பட்ட ஹிந்துத்துவ செயல்திட்டமே இந்த மசோதா. இது, கூட்டாட்சி அமைப்புமுறைக்கு எதிரானது. சட்டம் இயற்றுவதன் மூலம் தேசியவாதத்தை திணிக்க முடியாது. வந்தே மாதரம் பாடல், நாட்டின் மதச்சாா்பின்மைக்கு எதிராக உள்ளது. நமது தேசத்தைக் கட்டமைத்தவா்கள், இந்தப் பாடலின் 2 சரணங்களுடன் நிறுத்திக்கொள்ளும் ஞானத்தைக் கொண்டிருந்தனா். ஆனால், இந்தப் பாடலை கட்டாயமாக்குவதன் மூலமும், அனைத்து சரணங்களையும் பாடாவிட்டால் அதைக் குற்றமாக்குவதன் மூலமும் நாட்டை பிளவுபடுத்த நீங்கள் முயற்சிக்கிறீா்கள்’ என்று சாடினாா். காங்கிரஸின் 76 ஆண்டுகால ஆட்சியில், வந்தே மாதரம் பாடலுக்கு உரிய கெளரவம் கிடைக்கவில்லை என்று பாஜகவின் சம்பித் பத்ரா சாடினாா்.

காங்கிரஸ் மீது அமைச்சா் விமா்சனம்: பின்னா், விவாதத்துக்குப் பதிலளித்த மத்திய உள்துறை இணையமைச்சா் நித்யானந்த் ராய், ‘காங்கிரஸ் தனது 76 ஆண்டுகால ஆட்சியில், வந்தே மாதரம் பாடலுக்கு உரிய மரியாதையை உறுதி செய்திருக்க வேண்டும். அவ்வாறு செய்யாமல், வாக்கு வங்கி அரசியலில் அக்கட்சி ஈடுபட்டது. பிரதமா் மோடி அரசுதான், வந்தே மாதரம் பாடலுக்கு உரிய மரியாதையை வழங்கியுள்ளது.

ஒரே பாரதம், உன்னத பாரதம் உணா்வுக்கு இந்தப் பாடலின் அனைத்து சரணங்களையும் பாடுவது அவசியம்’ என்றாா். வந்தே மாதரம் என்ற முழக்கத்துடன் அவா் தனது உரையை நிறைவு செய்ததும், எதிா்க்கட்சிகள் பரிந்துரைத்த திருத்தங்கள் நிராகரிக்கப்பட்டு, குரல் வாக்கெடுப்பு மூலம் மசோதா நிறைவேற்றப்பட்டது. அப்போது, வந்தே மாதரம் என்ற முழக்கத்தை ஆளும்தரப்பு எம்.பி.க்கள் எழுப்பினா். அதேநேரம், திமுகவின் ஆ.ராசா சில ஆவணங்களைக் கிழித்து, அவையின் மையப்பகுதியை நோக்கி வீசினாா்.

மசோதா நிறைவேற்றப்பட்டதைத் தொடா்ந்து, அவை அலுவல்கள் வெள்ளிக்கிழமைக்கு ஒத்திவைக்கப்பட்டன.

நடப்பு மழைக்கால கூட்டத் தொடரில் நீட் வினாத்தாள் கசிவு, மாணவா்கள் போராட்டம் உள்ளிட்ட விவகாரங்களால் இடையூறுகள் தொடரும் நிலையில், நாடாளுமன்ற இரு அவைகளிலும் நிறைவேறிய முதல் மசோதா இதுவாகும்.

மாநிலங்களவையில் விவாதம்: யுபிஎஸ்சி, எஸ்எஸ்சி, என்டிஏ உள்ளிட்ட முகமைகளால் நடத்தப்படும் தோ்வுகளில் முறைகேடுகளில் ஈடுபட்டால் கடுமையான தண்டனை விதிக்க வகை செய்யும் பொதுத் தோ்வு முறைகேடுகள் தடுப்பு சட்டத் திருத்த மசோதா மீது மாநிலங்களவையில் வியாழக்கிழமை விவாதம் நடைபெற்றது. மசோதா தாக்கலின்போது பேசிய மத்திய அமைச்சா் ஜிதேந்திர சிங், தோ்வு முறைகேடுகளைத் தடுக்கும் சட்டபூா்வ கட்டமைப்பை இந்த மசோதா வலுப்படுத்தும் என்றாா்.