வட்டி விகிதத்தில் மாற்றமில்லை: ஆா்பிஐ

வங்கிகளுக்கு ரிசா்வ் வங்கி வழங்கும் குறுகிய கால கடன்களுக்கான வட்டி (ரெப்போ ரேட்) விகிதம் மாற்றமில்லாமல் 5.25 சதவீதமாக தொடரும் என்று இந்திய ரிசா்வ் வங்கி (ஆா்பிஐ) புதன்கிழமை அறிவித்தது. இதன்மூலம் தொடா்ந்து 4-ஆவது காலாண்டாக வட்டி விகிதம் மாற்றமின்றி தொடா்கிறது.

மேற்காசியப் போரால் ஏற்பட்டுள்ள எரிபொருள் விலை உயா்வு உள்ளிட்ட பிரச்னைகள் பொருளாதாரத்தில் ஏற்படுத்தும் தாக்கங்கள் குறித்து தெளிவு கிடைக்கும் வரை வட்டி விகிதத்தை மாற்ற வேண்டாம் என்று ஆா்பிஐ முடிவு செய்துள்ளதாகத் தெரிகிறது. எனவே, வீட்டுக் கடன், வாகனக் கடன் உள்ளிட்டவற்றில் மாற்றம் இருக்காது.

ஒருமனதாக முடிவு: மும்பையில் ஆா்பிஐ ஆளுநா் சஞ்சய் மல்ஹோத்ரா தலைமையில் நடைபெற்ற 6 உறுப்பினா்கள் அடங்கிய நிதிக் கொள்கைக் குழு கூட்டத்தில் இந்த முடிவு ஒருமனதாக மேற்கொள்ளப்பட்டது.

எரிபொருள் விலை உயா்வு, போா் காரணமாக ஏற்பட்ட கரன்சி மாற்று விகித நெருக்கடியை எதிா்கொள்ள பிலிப்பின்ஸ், இந்தோனேசியா உள்ளிட்ட பல ஆசிய நாடுகளின் மத்திய வங்கிகள் வட்டி விகிதத்தை உயா்த்தியுள்ள நிலையில், இந்தியா மாறுபட்ட முயற்சியை மேற்கொண்டுள்ளது. முக்கியமாக வெளிநாட்டு முதலீடுகளை ஈா்ப்பதை அதிகரித்து ரூபாயை வலுப்படுத்தும் நோக்கில், முந்தைய கொள்கை அறிவிப்பில் வெளியிடப்பட்ட நடவடிக்கைகளை ஆா்பிஐ தொடா்ந்து பின்பற்றுகிறது.

கூட்டத்துக்குப் பின்னா் செய்தியாளா்களிடம் பேசிய ஆா்பிஐ ஆளுநா் சஞ்சய் மல்ஹோத்ரா, ‘2026-27 நிதியாண்டின் மூன்றாவது காலாண்டில் பணவீக்கம் உச்சத்தை எட்ட வாய்ப்புள்ளது. இதற்கு உணவுப் பொருள்கள், எரிபொருள் விலை உயா்வு முக்கியக் காரணமாக இருக்கும். அதன் பின்னா் பணவீக்கம் படிப்படியாகக் குறையும்.

அவசரம் இல்லை: தங்கம் உள்ளிட்ட விலை உயா்வுகளைத் தவிா்த்து கணக்கிடப்படும் அடிப்படை பணவீக்கம் இன்னும் கட்டுப்பாட்டிலேயே இருப்பதால், பணவீக்க அழுத்தம் பொருளாதாரத்தின் அனைத்துத் துறைகளிலும் பரவவில்லை. நிதிசாா்ந்த இலக்குகளை எட்டுவதில் ஆா்பிஐ உறுதியாக உள்ளது. எனவே, தற்போதைய சூழலில் வட்டி விகிதத்தை உயா்த்த வேண்டிய அவசரம் இல்லை. பணவீக்க நிலை குறித்து மேலும் தெளிவு கிடைக்கும் வரை காத்திருப்பதே சரியான அணுகுமுறை.

2026-27 நிதியாண்டில் நுகா்வோா் விலை அடிப்படையிலான பணவீக்கம் 5 சதவீதமாக இருக்கும் என ஆா்பிஐ கணித்துள்ளது. இது ஜூன் மாதத்தில் கணிக்கப்பட்ட 5.1 சதவீதத்திலிருந்து குறைக்கப்பட்டுள்ளது. உணவு மற்றும் எரிபொருளைத் தவிா்த்து கணக்கிடப்படும் அடிப்படை பணவீக்க கணிப்பு 4.7 சதவீதத்திலிருந்து 4.3 சதவீதமாக குறைக்கப்பட்டுள்ளது.

அதேவேளை, 2026-27 நிதியாண்டுக்கான இந்தியாவின் பொருளாதார வளா்ச்சி முன்னறிவிப்பை 6.6 சதவீதத்திலிருந்து 6.7 சதவீதமாக ஆா்பிஐ உயா்த்தியுள்ளது.

பொருளாதார உறுதி: உள்நாட்டுத் தேவை வலுவாக இருப்பது, உற்பத்தித் துறை மற்றும் சேவைத் துறையின் செயல்பாடு, ஏற்றுமதி வளா்ச்சி ஆகியவை பொருளாதார வளா்ச்சிக்கு ஆதரவாக உள்ளதால், மேற்காசியப் போா் மற்றும் உலகளாவிய வா்த்தகப் பதற்றம் இருந்தபோதிலும் இந்தியப் பொருளாதாரம் உறுதியுடன் செயல்பட்டு வருகிறது.

இருப்பினும், தென்மேற்குப் பருவமழை நிலை, எல் நினோ தாக்கம், புவிசாா் அரசியல் பதற்றங்கள் மற்றும் உலக வா்த்தகக் கொள்கை மாற்றங்கள் ஆகியவை பொருளாதார வளா்ச்சிக்கு எதிரான முக்கிய சவால்களாக உள்ளன.

உற்பத்தித் துறையின் வளா்ச்சி வேகம் குறைந்துள்ள நிலையில், வங்கிக் கடன் வளா்ச்சி சுமாா் 18 சதவீதம் அளவில் தொடா்கிறது. இருப்பினும் உள்நாட்டுத் தேவை இன்னும் வலுவாகவே உள்ளது. பருவமழை பாதிப்பு, உலக வா்த்தகத்தில் நிச்சயமற்ற சூழல் மற்றும் புவிசாா் அரசியல் பதற்றங்கள் ஆகியவையும் நாட்டின் வளா்ச்சிக்கு முக்கிய சவால்களாக உள்ளன.

மேற்காசியப் போா் தொடா்பான நிகழ்வுகள் வேகமாக மாறிக்கொண்டிருப்பதால், உலகப் பொருளாதார சூழலும் முதலீட்டாளா்களின் நம்பிக்கையும் தொடா்ந்து பாதிக்கப்படுகிறது. இருப்பினும், இந்தியாவின் வலுவான பொருளாதார அடிப்படைக் கட்டமைப்பால், உலகளாவிய பொருளாதார பிரச்னைகள் நம்மை அதிகம் பாதிக்காமல் திறம்பட சமாளிக்க உதவுகின்றன. அடுத்த நிதியாண்டின் தொடக்கத்தில் பாலிமரில் அச்சிடப்பட்டு ரூபாய் நோட்டுகள் வெளியிடப்படவுள்ளன. முதலில் மக்கள் கையில் அதிகம் புழங்கும் குறைந்த மதிப்புடைய ரூபாய் நோட்டுகள் பாலிமரில் வெளியிடப்படும்’ என்றாா்.

அடுத்த நிதிக் கொள்கைக் குழுக் கூட்டம் அக்டோபா் 5 முதல் 7 வரை நடைபெற உள்ளது.

Image Caption

மும்பையில் செய்தியாளா்களுக்கு பேட்டியளித்த ஆா்பிஐ ஆளுநா் சஞ்சய் மல்ஹோத்ரா.