அமேதியில் ஒட்டப்பட்டிருக்கும் இந்த போஸ்டர்களைப் பார்த்தீர்களா?

லக்னௌ: காங்கிரஸ் தலைவராக பதவியேற்ற பிறகு தனது நாடாளுமன்ற தொகுதியான அமேதிக்கு முதல் முறையாக ராகுல் காந்தி இன்று வருகை தர உள்ளார்.

அவரது வருகையை முன்னிட்டு, அமேதி முழுவதும் விதவிதமான போஸ்டர்கள் ஒட்டப்பட்டுள்ளன. அதில், பத்து தலைகளுடன் ராவணன் வடிவில் மோடியின் புகைப்படமும், அவரை வதம் செய்யும் ராமனாக ராகுல் புகைப்படமும் இடம்பெற்றிருக்கும் ஒரு போஸ்டர் பல இடங்களில் ஒட்டப்பட்டுள்ளது.

அந்த போஸ்டரில், ராகுல் காந்தி, பாஜகவின் அரக்க ஆட்சியை முடிவுக்குக் கொண்டு வந்து நாட்டில் ராம ராஜ்யத்தை உருவாக்கப் போவதாகவும் கூறப்பட்டுள்ளது. இதனை உள்ளூர் காங்கிரஸ் தலைவர் அபய் ஷுக்லா அச்சடித்து ஒட்டியுள்ளார்.
 

இது குறித்து மாவட்ட காங்கிரஸ் தலைவர் கூறுகையில், இது கட்சியின் அதிகாரப்பூர்வ போஸ்டர் அல்ல என்றும், அப்படியே இருந்தாலும் அதில் ஆட்சேபனைக்குரிய விஷயம் எதுவும் இல்லை என்றும் கூறப்பட்டுள்ளது.

தாங்கள் வாக்களித்த தலைவரை வரவேற்க தொண்டர்கள் தங்களுக்கென ஒரு பாணியை பின்பற்றுகிறார்கள் என்றார்.

இன்று மதியம் அமேதி வரும் ராகுல், அங்கு பொதுக் கூட்டத்திலும் கலந்து கொள்கிறார். காங்கிரஸ் தலைவராக பொறுப்பேற்றுக் கொண்ட பிறகு அமேதிக்கு முதல் முறையாக வரும் ராகுலுக்கு பிரம்மாண்ட வரவேற்பு அளிக்க கட்சித் தலைவர்கள் முடிவு செய்துள்ளனர்.