ஆட்டம் காணும் அடிப்படை...

பிரபல பாலிவுட் நடிகா் சைஃப் அலிகான் மும்பையில் உள்ள அவரது அடுக்குமாடிக் குடியிருப்பில் கத்தியால் சரமாரியாகக் குத்தப்பட்ட சம்பவம் நாடு தழுவிய அளவில் அதிா்ச்சி அலையை எழுப்பியது. குற்றவாளி அடையாளம் காணப்பட்டு காவல் துறையின் பிடியில் சிக்கிவிட்டாா் என்றாலும்கூட அந்தச் சம்பவம் ஏற்படுத்திய அதிா்ச்சியும், தாக்கமும் இன்னமும்கூடக் குறைந்தபாடில்லை. இந்தியாவில் அதுவும் பெருநகரங்களில், சட்டம்- ஒழுங்கு சீா்குலைந்துள்ளது என்பதன் வெளிப்பாடாக இந்தச் சம்பவம் விமா்சிக்

மும்பையின் பாந்த்ரா பகுதியில் அமைந்த பாலிவுட் நடிகா் சைஃப் அலிகான்- நடிகை கரீனா கபூா் தம்பதியின் சத்குரு சரண் அடுக்குமாடிக் குடியிருப்பின் 12-ஆவது தளத்தில் இந்தச் சம்பவம் நடந்திருக்கிறது. நள்ளிரவு 2.30 மணியளவில் கத்திக்குத்து சம்பவம் நடந்தபோது, சைஃப் அலிகான், மனைவி கரீனா கபூா் உள்ளிட்ட குடும்ப உறுப்பினா்கள் வீட்டில் இருந்திருக்கிறாா்கள். கொள்ளையடிக்கும் முயற்சியில் வீட்டுக்குள் ஊடுருவிய மா்ம நபா் சைஃப் அலிகானை சராமாரியாக குத்திவிட்டு தப்பிவிட்டாா். 6 முறை கத்தியால் குத்தப்பட்ட நிலையில், பலத்த காயங்களுடன் மருத்துவமனையில் அனுமதிக்கப்பட்டாா் சைஃப் அலிகான்.

கொள்ளையடிக்கும் நோக்கில் வீட்டுக்குள் ஊடுருவி பதுங்கியிருந்த நபா் வீட்டில் இருந்ததைப் பாா்த்து கூச்சல் எழுப்பியிருக்கிறாா் பணிப்பெண். அந்த மா்ம நபருடன் ஏற்பட்ட கைகலப்பில் குத்தப்பட்ட சைஃப் அலிகானை ஆட்டோவில் ஏற்றி, அதே பகுதியில் உள்ள லீலாவதி மருத்துவமனையில் அனுமதித்துள்ளனா். அறுவைச் சிகிச்சை மேற்கொள்ளப்பட்ட சைஃப் அலிகான் உயிா் பிழைத்து வீடு திரும்பியிருக்கிறாா் என்பது ஆறுதல் அளிக்கிறது.

3 நாள் வலைவீச்சு தேடலுக்குப் பிறகு தானாவில் பதுங்கியிருந்த அந்த நபா் கைது செய்யப்பட்டிருக்கிறாா். சட்டவிரோதமாக இந்தியாவுக்கு வந்த வங்கதேசத்தைச் சோ்ந்த 30 வயது ஷரீஃபுல் இஸ்லாம் என்கிற இளைஞா் கைது செய்யப்பட்டிருக்கிறாா். இந்தியாவுக்குள் தனது பெயரை விஜய்தாஸ் என்று மாற்றிக் கொண்டு மும்பையில் தங்கி, கிடைக்கும் வேலைகளைச் செய்துவந்த ஷரீஃபுல் இஸ்லாம் திருடுவதற்காக சைஃப் அலிகானின் வீட்டில் நுழைந்ததாக, வாக்குமூலம் அளித்திருக்கிறாா். தான் நுழைந்தது நடிகா் சைஃப் அலிகானின் வீடு என்பது தெரியாது என்றும், தப்பிஓட விடாமல் தன்னை இறுகக் கட்டிப்பிடித்ததால், சைஃப் அலிகானை கத்தியால் குத்தித் தப்பித்ததாகவும் ஷரீஃபுல் இஸ்லாம் தெரிவித்திருக்கிறாா்.

சைஃப் அலிகான் குத்தப்பட்ட சம்பவம் பல்வேறு கேள்விகளை எழுப்புகிறது. மும்பையின் பணக்காரா்கள் வசிக்கும் பகுதி மட்டுமல்லாமல், கண்காணிப்பு கேமிரா உள்பட பல அடுக்குப் பாதுகாப்பு இருந்தும் , ஷரீஃபுல் இஸ்லாமால் சைஃப் அலிகானின் வீட்டுக்குள் யாா் கண்ணிலும் படாமல் எப்படி நுழைய முடிந்தது என்பது முதல் கேள்வி. நள்ளிரவு மணி 2.30 என்றாலும், பிரபல நடிகா் சைஃப் அலிகானை மருத்துவமனைக்கு அழைத்துச் செல்ல ஆம்புலன்ஸ் கிடைக்காமல் ஆட்டோவில் கொண்டு செல்ல நோ்ந்ததை என்னவென்று சொல்வது?

அதிக தாமதம் இல்லாமல் அடையாளம் தெரியாத குற்றவாளியைக் கைது செய்த காவல் துறையைப் பாராட்டப்பட வேண்டும் என்றாலும்கூட இதுபோன்ற நிகழ்வு மும்பை காவல் துறையை கேலிக்குள்ளாக்குகிறது.

ஒருகாலத்தில் கடத்தல்காரா்கள், தாதாக்களின் பிடியில் சிக்கியிருந்த மும்பை ஓரளவுக்கு மீட்கப்பட்டிருக்கிறது என்பது உண்மை. ஆனால், சமீபகாலமாக மீண்டும் மும்பையில் சட்டம்-ஒழுங்கு கேள்விக்குறியாகி இருப்பதை சில நிகழ்வுகள் வெளிப்படுத்துகின்றன.

பிரபல தொழிலதிபா் முகேஷ் அம்பானியின் வீட்டுக்கு அருகேயுள்ள சாலையில் வெடிகுண்டுகள் காணப்பட்ட மோட்டாா் வாகனம் நிறுத்தப்பட்டிருந்தது. பாந்த்ரா பகுதியில் சல்மான்கானின் வீட்டின் அருகே நடைபெற்ற கைவெடிகுண்டு வீச்சு காரணமாக, அவா் தனது வீட்டின் பால்கனியை குண்டு துளைக்காத ஜன்னல்களால் அடைத்திருக்கிறாா். கடந்த அக்டோபா் மாதம் சல்மான் கானின் நண்பரும் தேசியவாத காங்கிரஸ் கட்சியின் மூத்தத் தலைவருமான பாபா சித்திக் நடுத்தெருவில் சுட்டுக் கொல்லப்பட்டாா்; இவற்றின் பின்னணியில் சைஃப் அலிகானின் வீட்டில் நடந்த கத்திக்குத்து சம்பவத்தையும் பாா்க்கத் தோன்றுகிறது.

அரசியல்வாதிகள்தான் தனிப்பட்ட மற்றும் காவல்துறையின் துப்பாக்கி ஏந்திய காவலா்களுடன் வாழவும், வலம் வரவும் முடியும். சாமானிய மக்கள் தங்களைத் தாங்களே பாதுகாத்துகொள்வதுதான் வழி என்று இருந்தால், அது காவல் துறைக்குப் பெருமை சோ்க்காததாக இருக்காது. எந்தவொரு தனிமனிதனும் தனது வீட்டில் திருட்டு பயமோ, கொள்ளையா்களின் தாக்குதலோ இல்லாமல் வாழ முடியும் சூழலை வழங்குவது என்பதுதான் அடிப்படை சட்டம்-ஒழுங்கு.

மக்கள்தொகை கணக்கெடுப்பு மட்டுமல்லாமல், சட்ட விரோதமாகக் குடியேறியவா்களின் அடையாளம் கண்டு அகற்றும் முயற்சியை சிறுபான்மையினருக்கு எதிரான செயல்பாடாக வா்ணிக்க முற்படுபவா்களுக்கு சைஃப் அலிகான் வீட்டில் நடந்த கத்திக்குத்து சம்பவம் புதிய தெளிவை ஏற்படுத்த வேண்டும்.

கதவைப் பூட்டிக் கொண்டாலும்கூட பாதுகாப்பு இல்லை என்பது பிரபல நடிகா் சைஃப் அலிகானுக்கே நோ்கிறது என்றால், சாமானியா்களின் நிலை என்ன? என்கிற கேள்வி எழுகிறது. மும்பை மட்டுமல்ல; எல்லா நகரங்களிலும் சட்டம்- ஒழுங்கு கேள்விக்குறியாவதும், திருட்டும் கொள்ளையும் அதிகரிப்பதும் காவல் துறையினுடைய பலவீனத்தின் அறிகுறிகள்.