பிரிவும் உறவும்!

நிரந்தர நண்பர்களும் இல்லை, நிரந்தரப் பகைவர்களும் இல்லை என்பது மீண்டும் உறுதிப்படுத்தப்பட்டிருக்கிறது.

Updated On :5 ஜனவரி 2024, 7:48 am

பகிர்:

நிரந்தர நண்பர்களும் இல்லை, நிரந்தரப் பகைவர்களும் இல்லை என்பது மீண்டும் உறுதிப்படுத்தப்பட்டிருக்கிறது. அமெரிக்காவுக்கும், கியூபாவுக்கும் இடையே நிலவிய அரை நூற்றாண்டு கால விரோதம் முடிவுக்கு வந்திருக்கிறது. இரண்டு நாடுகளுக்கும் இடையேயான ராஜீய உறவு மறுபடியும் ஏற்படுத்தப்பட்டிருக்கிறது. இதற்கு முன்னர் பதவி வகித்த ஒன்பது அமெரிக்க அதிபர்களால் சாதிக்க முடியாததை பராக் ஒபாமா நடத்திக் காட்டியிருக்கிறார்.

கடந்த இரண்டு ஆண்டுகளாகவே அமெரிக்காவுக்கும், கியூபாவுக்கும் இடையே ரகசியப் பேச்சுவார்த்தைகள் நடந்து கொண்டிருந்தன. வத்திகனிலுள்ள கத்தோலிக்கத் திருச்சபையின் ஆசியுடனும், கனடா அரசின் உதவியுடனும் நடந்து வந்த இந்த ரகசியப் பேச்சுவார்த்தை பல தடைகளையும் கடந்து வெற்றியில் முடிந்திருக்கிறது என்றால், அதற்கு போப்பாண்டவர் பிரான்சிஸ் காட்டிய அக்கறைதான் காரணம். வத்திகனில் நடந்த இறுதிக்கட்டப் பேச்சுவார்த்தைக்குப் பிறகு, அமெரிக்க அதிபர் ஒபாமாவும், கியூபா அதிபர் ரௌல் காஸ்ட்ரோவும் தொலைபேசியில் உரையாடியதுடன், அரை நூற்றாண்டு விரோதம் முடிவுக்கு வந்தது.

இரு நாடுகளுக்கும் இடையேயான பயணம், வங்கிப் பரிமாற்றம், வணிகம் ஆகியவற்றுக்கான விதிமுறைகளும், நடைமுறைகளும் தளர்த்தப்பட்டு, பிற நாடுகளைப் போலவே கியூபாவும், அமெரிக்காவுடன் உறவு வைத்துக் கொள்வது என்பதை இரு தரப்பினரும் ஏற்றுக் கொண்டிருக்கிறார்கள். அத்துடன் இரண்டு நாட்டு சிறைகளிலும் உள்ள அரசியல் கைதிகள் விடுவிக்கப்பட்டு, அவரவர் நாட்டுக்கு அனுப்பப்படுவர் என்பதும் ஏற்றுக் கொள்ளப்பட்டிருக்கிறது.

1959-இல் நடந்த புரட்சிக்குப் பிறகு பிடல் காஸ்ட்ரோ ஆட்சியைக் கைப்பற்றி கியூபாவில் கம்யூனிச அரசை நிறுவியதைத் தொடர்ந்து எல்லா சொத்துகளும் நாட்டுடைமை ஆக்கப்பட்டன. அதனால், மிக அதிகமாக பாதிக்கப்பட்டது அமெரிக்காதான். அங்கே இருந்த சர்க்கரை ஆலைத் தொழிற்சாலைகளும், வணிகமும் அதுவரை அமெரிக்கர்கள் வசம்தான் இருந்தன.

காஸ்ட்ரோ எதிர்ப்பாளர்களுக்கு ஆதரவாக, கியூபாவின் கம்யூனிச அரசை அகற்றி ஜனநாயகத்தை ஏற்படுத்த அமெரிக்கா எடுத்துக்கொண்ட அனைத்து முயற்சிகளும் தோல்வியில் முடிந்தன. அமெரிக்கா கியூபா மீது பொருளாதாரத் தடை விதித்தது. இதை ஏனைய நாடுகள் ஆதரிக்கவில்லை என்றாலும்கூட, கியூபாவை அந்தத் தடை பாதிக்கவே செய்தது.

பிடல் காஸ்ட்ரோ தலைமையில் கம்யூனிச நாடாக கியூபா வெற்றிகரமாகத் தொடர முடிந்ததற்குக் காரணம், அன்றைய சோவியத் யூனியனின் முழு ஆதரவு இருந்ததுதான். 1991-இல் சோவியத் யூனியனின் வீழ்ச்சிக்குப் பிறகு, ரஷியா கியூபாவுக்கு அளித்து வந்த சலுகைகளையும், மானியங்களையும், ராணுவ ஆதரவையும் படிப்படியாக விலக்கிக் கொண்டுவிட்டது. 2008-இல், தனது உடல்நிலையைக் கருதி பிடல் காஸ்ட்ரோ பதவி விலகி, தனது சகோதரர் ரௌல் காஸ்ட்ரோவிடம் பொறுப்பை ஒப்படைத்தார்.

கியூபா மீதான பொருளாதாரத் தடையை அகற்ற வேண்டுமானால் அதற்கு அமெரிக்க நாடாளுமன்றத்தின் ஒப்புதல் தேவை. இப்போதைய நிலையில் இரண்டு அவைகளில் எதிலும் அதிபர் ஒபாமாவின் ஜனநாயகக் கட்சிக்குப் பெரும்பான்மை இல்லை என்பது மட்டுமல்ல, குடியரசுக் கட்சி கியூபாவுடனான சுமுக உறவை ஆதரிக்கத் தயாராகவும் இல்லை.

உடனடியாக அமெரிக்கா செய்யக் கூடியதும், செய்யப் போவதும் கியூபாவில் தகவல் தொலைத்தொடர்பை பலப்படுத்துவது. ஒரு நாட்டின் கலாசாரத்தையும், அரசியல் அமைப்பையும் தகர்க்கவல்ல சக்தி வாய்ந்த ஆயுதம் சமூகவலைதளங்களும், ஊடகங்களும்தான் என்பது அமெரிக்காவுக்குத் தெரியாதா என்ன?

மக்களால் நான்கு ஆண்டுகளுக்கு ஒரு முறை தேர்ந்தெடுக்கப்படும் அமெரிக்க அதிபர் இரண்டு முறைக்கு மேல் பதவி வகிக்க முடியாது. பராக் ஒபாமாவுக்கு இது இரண்டாவது முறை. இதுவரை அவர் பெருமைப்பட்டுக் கொள்ளும்படியாக எதுவும் செய்துவிடவில்லை. நாடாளுமன்ற மேலவைக்கு நடந்த தேர்தல்களில் அவரது ஜனநாயகக் கட்சி தொடர்ந்து தோல்வியைச் சந்தித்து வருகிறது. இந்த நிலையில், அவர் பதவியிலிருந்து ஓய்வு பெறுவதற்குள் தனது சாதனை என்று காட்டிக்கொள்ள ஏதாவது செய்தாக வேண்டும்.

பல்வேறு குற்றச்சாட்டுகளுக்கு ஆளாகிப் பதவி விலக வேண்டிவந்த அமெரிக்காவின் முன்னாள் அதிபர் ரிச்சர்ட் நிக்சன், சீனாவுடன் உறவை ஏற்படுத்தியதற்காக இன்றளவும் நினைவுகூரப்படுகிறார். அதிபர் ஒபாமாவின் தவறுகளும், தோல்விகளும் கியூபாவுடன் துணிந்து உறவைப் புதுப்பித்திருப்பதன் மூலம் மறக்கப்படலாம். அவர் இதற்காக நினைவுகூரப்படலாம். அவர் மட்டுமல்ல, பிடல் காஸ்ட்ரோவும்கூடத்தான் - சரித்திரப் புத்தகங்களில்!

தினமணி செய்திமடலைப் பெற... Newsletter

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Arattai, Google News