இசையமைப்பாளர் தேவா காலமானார்!

பிரபல இசையமைப்பாளா் தேவா (76) உடல்நலக் குறைவால் சென்னையில் சனிக்கிழமை (அக். 17) காலமானாா்.

கானா இசை: சென்னை மயிலாப்பூரில் கடந்த 1950-ஆம் ஆண்டு பிறந்த தேவாவின் இயற்பெயா் சொக்கலிங்கம் தேவநேசன். சிறு வயதிலிருந்தே இசையில் ஆா்வம் கொண்டிருந்த அவா், தன்ராஜ் மாஸ்டரின் மேற்கத்திய இசை கற்று, லண்டன் டிரினிட்டி கல்லூரியில் இசைத் தோ்வில் தோ்ச்சிப் பெற்றவா். சென்னையில் பரவலாக பாடப்பட்ட கானா பாடல்களை, வெகுசன மக்களின் ரசனைக்கு ஏற்ப திரைப்படங்களின் வழியே கொண்டு சோ்த்த பெருமை தேவாவையே சேரும்.

வைகாசி பொறந்தாச்சு: திரைத் துறைக்கு வருவதற்கு முன்பே நூற்றுக்கணக்கான பக்தியிசை பாடல்களுக்கு இசை அமைத்திருந்த தேவா, 1986-ஆம் ஆண்டு வெளியான ‘மாட்டுக்கார மன்னாரு’ திரைப்படத்தின் மூலம் தமிழ் திரையுலகில் இசையமைப்பாளராக அறிமுகமானாா்.

இதைத் தொடா்ந்து 1989-இல் ராமராஜன் நடித்த ‘மனசுக்கேத்த மகராசா’ திரைப்படத்துக்கு தேவா இசை அமைத்தாா். 1990-இல் வெளியான ‘வைகாசி பொறந்தாச்சு’ திரைப்படம்தான் தேவாவுக்கு மிகப்பெரிய வெற்றிப் படமாகவும், அவருக்கான திருப்புமுனை திரைப்படமாகவும் அமைந்தது.

ரஜினிகாந்த் பெயருக்கான பிரத்யேக இசை: நடிகா் ரஜினிகாந்த் நடித்த அண்ணாமலை, அருணாசலம், பாட்ஷா ஆகிய 3 வெற்றி திரைப்படங்களுக்கு தேவா இசை அமைத்தாா். இதில், அண்ணாமலை மற்றும் பாட்ஷா படங்களின் பின்னணி இசை அனைவராலும் கொண்டாடப்பட்டவை.

ரஜினிகாந்தின் திரைப்படங்களில் அவரது பெயருக்ககாக பிரத்யேக இசையை உருவாக்கினாா் தேவா. இன்றளவும் அந்த இசை, உலகெங்கும் உள்ள ரஜினி ரசிகா்களால் கொண்டாடப்படுகிறது.

விஜய் - அஜீத் திரைப்படங்கள்: அதேபோல், 1990-களில் புதுமுக நாயகா்களாக அறிமுகமாகி இருந்த தற்போதைய முதல்வா் விஜய், அஜீத், பிரசாந்த் உள்ளிட்ட பலரது திரைப்படங்களுக்கு இசையமைத்து, அவா்களது வெற்றிக்கு உறுதுணையாக இருந்தவா் தேவா. முதல்வா் விஜய்யின் நேருக்கு நோ், நினைத்தேன் வந்தாய், தேவா, விஷ்ணு, ரசிகன், குஷி, பகவதி, பிரியமுடன் உள்ளிட்ட படங்களுக்கும், அஜீத்தின் காதல்கோட்டை, நேசம், ஆனந்த பூங்காற்றே, வாலி உள்ளிட்ட படங்களுக்கும் தேவாவின் இசை மாபெரும் வெற்றியைத் தேடித் தந்தன. தமிழ் மட்டுமன்றி தெலுங்கு, மலையாளம் உள்பட 400-க்கும் மேற்பட்ட படங்களுக்கு இசையமைத்துள்ளாா் தேவா.

‘தேனிசை தென்றல்’: மெல்லிசை மன்னா் எம்.எஸ்.விஸ்வநாதன், தேவாவுக்கு ‘தேனிசை தென்றல்’ என்ற பட்டத்தை வழங்கினாா். வைகாசி பொறந்தாச்சு, ஆசை, குஷி உள்ளிட்ட திரைப்படங்களுக்காக தமிழக அரசின் சிறந்த இசையமைப்பாளா் விருதையும், அமிா்த வா்ஷினி என்ற கன்னட திரைப்படத்துக்காக சிறந்த இசையமைப்பாளருக்கான ஃபிலிம்போ் விருதையும் பெற்றாா். 1992-ஆம் ஆண்டு தமிழக அரசால், கலைமாமணி விருது வழங்கி கௌரவிக்கப்பட்டாா்.

இசையமைப்பாளா் தேவாவுக்கு சங்கீதா, பிரதா ஆகிய மகள்களும், ஸ்ரீகாந்த் தேவா என்ற மகனும் உள்ளனா்.

இன்று இறுதிச் சடங்கு: மறைந்த தேவாவின் உடல் அவரது சொந்த ஊரான ராணிப்பேட்டை மாவட்டம் ஆற்காடு அருகே உள்ள சக்கரமநல்லூருக்கு ஞாயிற்றுக்கிழமை (அக். 18) பகல் 1 மணிக்கு மேல் எடுத்துச் செல்லப்பட்டு, இறுதிச் சடங்குகள் செய்யப்பட உள்ளன. சென்னையில் பொதுமக்கள் அஞ்சலிக்காக தேவாவின் உடல் வைக்கப்பட்டுள்ளது.