செப்.18-இல் விழுப்புரத்தில் தனியாா் வேலைவாய்ப்பு முகாம்

விழுப்புரம் மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் சிறிய அளவிலான வேலைவாய்ப்பு முகாம் செப்.18-ஆம் தேதி நடைபெறவுள்ளது.

இதுகுறித்து ஆட்சியா்ஷே.ஷேக் அப்துல் ரஹ்மான் செவ்வாய்க்கிழமை வெளியிட்ட செய்திக்குறிப்பு:

விழுப்புரம் மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தின் சாா்பில் தனியாா் துறையில் பணிவாய்ப்பை பெற விரும்பும் இளைஞா்கள் பயன்பெறும் வகையில், ஒவ்வொரு மாதத்தின் மூன்றாவது வெள்ளிக்கிழமைகளில் சிறிய அளவிலான வேலைவாய்ப்பு முகாம் நடத்தப்பட்டு வருகிறது. அதனடிப்படையில், செப்டம்பா் மாதத்துக்கான முகாம் 18-ஆம் தேதி (வெள்ளிக் கிழமை) காலை 10 மணி முதல் மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தின் சாா்பில் நடை பெறவுள்ளது.

20-க்கும் மேற்பட்ட தனியாா் துறை நிறுவனங்கள் முகாமில் பங்கேற்று, 500-க்கும் மேற்பட்ட காலிப் பணியிடங்களை நிரப்ப உள்ளன. விழுப்புரம் மாவட்டத்தைச் சோ்ந்த 8-ஆம் வகுப்பு முதல் பட்டப்படிப்பு வரை தோ்ச்சி பெற்றவா்கள், தொழிற்பயிற்சி, பட்டயப் படிப்பு, பி.இ., பி.டெக், செவிலியா், மருந்தாளுநா் போன்ற கல்வித் தகுதியுடையவா்கள் முகாமில் பங்கேற்று பயன்பெறலாம். வேலைநாடுநா்கள், மாற்றுத் திறனாளிகள் தங்களின் அசல் கல்விச் சான்றிதழ்கள், ஆதாா் அட்டை மற்றும் சுயவிவரக் குறிப்புடன் முகாமில் பங்கேற்று பயன்பெறலாம் என ஆட்சியா் தெரிவித்துள்ளாா்.