பூட்டிய வீட்டில் 20 பவுன் நகைகள், ரூ.2 லட்சம் திருட்டு

கள்ளக்குறிச்சி மாவட்டம், திருநாவலூா் அருகே பூட்டிய வீட்டின் கதவைத் திறந்து 20 பவுன் நகைகள், ரூ.2 லட்சம் ரொக்கம் திருடு போனது குறித்து போலீஸாா் வழக்குப் பதிந்து, விசாரிக்கின்றனா்.

திருநாவலூா் அருகிலுள்ள கே.குச்சிப்பாளையம் மாரியம்மன் கோயில் தெருவைச் சோ்ந்தவா் க.செந்தில்குமாா் (45), விவசாயி. இவா், செவ்வாய்க்கிழமை தனது மனைவியுடன் வெண்டைக்காய் அறுவடைக்கு சென்று விட்டாா். வீட்டிலிருந்த செந்தில்குமாரின் மகன் தேவன் (19) வீட்டை பூட்டி, சாவியை வீட்டின் ஒரு பகுதியில் வைத்துவிட்டு கல்லூரிக்கு சென்றுள்ளாா்.

இந்நிலையில், பிற்பகலில் செந்தில்குமாா்-தனது மனைவி செல்வராணியுடன் வீட்டுக்கு வந்த பாா்த்தபோது, கதவு திறக்கப்பட்டிருந்தது கண்டு அதிா்ச்சியடைந்தாா். தொடா்ந்து உள்ளே சென்று பாா்த்தபோது 2 பீரோக்கள் உடைக்கப்பட்டிருந்த நிலையில், அதில் வைக்கப்பட்டிருந்த 5 பவுன் ஆரம், 4 பவுன் தாலிச் சங்கிலி, 3 பவுன் நெக்லஸ், 4 பவுன் மாட்டல், 4 பவுன் சங்கிலி ஆகிய 20 சவரன் நகைகள் ரூ.2 லட்சம் ரொக்கம் ஆகியவை திருடப்பட்டிருந்தது அவருக்கு தெரியவந்தது.

இதுகுறித்த புகாரின் பேரில் திருநாவலூா் போலீஸாா் வழக்குப் பதிவு செய்து, விசாரணை நடத்தி வருகின்றனா்.