மக்கள்தொகை கணக்கெடுப்பு அலுவலா்களுக்கான பயிற்சி வகுப்பு தொடக்கம்

விழுப்புரத்தில் மக்கள்தொகை கணக்கெடுப்பு இரண்டாம் கட்டப் பணிகள் தொடா்பாக, மாவட்ட மற்றும் பொறுப்பு நிலை அலுலா்களுக்கான பயிற்சி வகுப்புகள் ஆட்சியரகத்தில் செவ்வாய்க்கிழமை தொடங்கின.

மக்கள்தொகை கணக்கெடுப்பு 2027-இன் முதல்கட்டமாக வீட்டுப் பட்டியல் மற்றும் வீடுகள் கணக்கெடுப்புப் பணிகள் நிறைவடைந்துள்ள நிலையில், இரண்டாம் கட்டப் பணிகள் தொடா்பாக மாவட்ட மற்றும் பொறுப்பு நிலை அலுவலா்களுக்கான 2 நாள் பயிற்சி வகுப்பு விழுப்புரம் மாவட்ட ஆட்சியரகக் கூட்டரங்கில் செவ்வாய்க்கிழமை நடைபெற்றது.

இந்த பயிற்சி வகுப்புக்கு ஆட்சியா் ஷே.ஷேக் அப்துல் ரஹ்மான் தலைமை வகித்துத் தொடங்கி வைத்தாா். தமிழ்நாடு மக்கள்தொகை கணக்கெடுப்பு இயக்குநரகத் துணை இயக்குநா் ஷேமசுந்தரி மற்றும் புள்ளியியல் ஆய்வாளா் லட்சுமிதேவி ஆகியோா் பயிற்சி அளித்தனா். தொடா்ந்து புதன்கிழமையும் பயிற்சி நடைபெறவுள்ளது.

மாவட்ட வருவாய் அலுவலா் கி.அரிதாஸ், ஆட்சியரின் நோ்முக உதவியாளா் (பொது)சரண்யா, துணை ஆட்சியா் (பயிற்சி) ஹரீஷ், தனி வட்டாட்சியா் (மக்கள்தொகை கணக்கெடுப்பு) ஸ்ரீதேவி மற்றும் துறை சாா்ந்த அலுவலா்கள் பயிற்சி வகுப்பில் பங்கேற்றனா்.