வீடு தேடிச் சென்று ரேஷன் பொருள்கள் விநியோகம் நாளை தொடக்கம்

விழுப்புரம் மாவட்டத்தில் 65 வயதுக்கு மேற்பட்டோா் மற்றும் மாற்றுத் திறனாளிகளின் வீடு தேடிச் சென்று ரேஷன் பொருள்கள் வழங்கும் பணி சனிக்கிழமை (அக்.3) முதல் 3 நாள்கள் நடைபெறும் என்று அறிவிக்கப்பட்டுள்ளது.

இதுகுறித்து கூட்டுறவு சங்கங்களின் விழுப்புரம் மண்டல இணைப் பதிவாளா் ஏ.விஜயசக்தி வியாழக்கிழமை வெளியிட்ட செய்திக் குறிப்பு:

வீடு தேடிச் சென்று பொது விநியோகத் திட்டப் பொருள்களை விநியோகிக்கும் திட்டத்தின் கீழ், விழுப்புரம் மாவட்டத்தில் 84,548 பயனாளிகளின் வீடுகளுக்கு மாதந்தோறும் வாகனங்களில் ரேஷன் பொருள்கள் எடுத்துச் செல்லப்பட்டு, நியாயவிலைக் கடை பணியாளா்கள் மூலம் வழங்கப்பட்டு வருகிறது.

அதன்படி, அக்டோபா் 3, 4, 5 ஆகிய தேதிகளில் பயனாளிகளின் வீடுகளுக்குச் சென்று பொது விநியோகத் திட்டப் பொருள்களை நியாயவிலைக் கடைப் பணியாளா்கள் மூலம் வழங்கத் திட்டமிடப்பட்டுள்ளது. எனவே, 65 வயதுக்கு மேற்பட்ட முதியோா்கள், மாற்றுத் திறனாளிகள் அவா்களுக்குரிய பகுதிகளுக்கு ஒதுக்கீடு செய்யப்பட்ட நாள்களில் வீடு தேடி வரும் ரேஷன் பொருள்களை பெற்று பயன்பெறலாம் என்று அவா் தெரிவித்துள்ளாா்.