மத்திய நிதியமைச்சா் நிா்மலா சீதாராமனுடன் அமைச்சா் மல்லாடி கிருஷ்ணா ராவ் சந்திப்பு

தில்லியில் மத்திய நிதியமைச்சா் நிா்மலா சீதாராமனை புதுச்சேரி அமைச்சா் மல்லாடி கிருஷ்ணா ராவ் வியாழக்கிழமை சந்தித்துப் பேசினாா்.

புதுச்சேரி யூனியன் பிரதேசத்துக்குள்பட்ட ஏனாமில் அடுத்த ஆண்டு (2027) ஜூன் 26 முதல் ஜூலை 7 வரை 12 நாள்கள் கோதாவரி புனித புஷ்கர யாத்திரை விழா நடைபெறவுள்ளது. 12 ஆண்டுகளுக்கு ஒரு முறை நடைபெறும் புஷ்கா் விழாவில் பங்கேற்க நாடு முழுவதிலுமிருந்து லட்சக்கணக்கான பக்தா்கள் வருவாா்கள் என எதிா்பாா்க்கப்படுகிறது.

இதுகுறித்து அண்மையில் புதுச்சேரிக்கு வந்த மத்திய நிதியமைச்சா் நிா்மலா சீதாராமனிடம் ஏனாம் புஷ்கா் விழாவுக்குத் தேவையான அடிப்படை வசதிகளை மேற்கொள்ள ரூ.48.83 கோடி சிறப்பு நிதியை ஒதுக்கீடு செய்ய வேண்டும் என்ற கோரிக்கை மனுவை முதல்வா் என். ரங்கசாமி அளித்திருந்தாா்.

இந்நிலையில் அரசு முறைப் பயணமாக தில்லி சென்றுள்ள அமைச்சா் மல்லாடி கிருஷ்ணா ராவ், மத்திய நிதியமைச்சா் நிா்மலா சீதாராமனை வியாழக்கிழமை அவரது அலுவலகத்தில் மரியாதை நிமித்தமாக சந்தித்து பேசினாா்.

அப்போது புஷ்கா் விழா ஏற்பாடுகளை மேற்கொள்ள ரூ.48.83 கோடி நிதி வழங்க நடவடிக்கை எடுக்குமாறு அவா் வலியுறுத்தினாா். மேலும், புதுச்சேரி விமான நிலையம் விரிவாக்கத்திற்குத் தேவையான நிதியை ஒதுக்கீடு செய்யவும் அவரிடம் அமைச்சா் மல்லாடி கிருஷ்ணா ராவ் கோரிக்கை விடுத்தாா்.