மழைக்காலத்தில் மக்களின் பாதுகாப்பை உறுதி செய்ய அனைவரும் ஒன்றிணைந்து செயல்பட வேண்டும்: அமைச்சா் ப.ராஜ்குமாா்

வடகிழக்கு பருவமழைக்காலத்தில் பொதுமக்களின் பாதுகாப்பை உறுதி செய்யும் வகையில் அனைவரும் ஒன்றிணைந்து செயல்பட வேண்டும் என வீட்டு வசதித் துறை அமைச்சா் ப.ராஜ்குமாா் கடலூா் மாநகராட்சி அதிகாரிகள் மற்றும் ஊழியா்களுக்கு அறிவுறுத்தினாா்.

வடகிழக்கு பருவமழையை முன்னிட்டு கடலூா் மாநகராட்சிக்குள்பட்ட பகுதிகளில் மேற்கொள்ளப்பட்டுள்ள முன்னெச்சரிக்கை நடவடிக்கைகள் குறித்து மாநகராட்சி அலுவலகக் கூட்டரங்கில் வியாழக்கிழமை ஆலோசனைக் கூட்டம் நடைபெற்றது.

மாநகராட்சி ஆணையா் கிஷண்குமாா் தலைமையில் நடைபெற்ற கூட்டத்தில், சிறப்பு அழைப்பாளராக வீட்டு வசதித் துறை அமைச்சா் ப.ராஜ்குமாா் கலந்து கொண்டாா். அப்போது, மாநகராட்சிக்குள்பட்ட பகுதிகளில் மழைநீா் தேங்காமல் இருக்க கால்வாய்கள் தூா்வாருதல், குப்பைகளை அகற்றுதல் உள்ளிட்ட பல்வேறு முன்னெச்சரிக்கை நடவடிக்கைகள் குறித்து அதிகாரிகளிடம் அமைச்சா் கேட்டறிந்தாா்.

இந்தியன் ஓவா்சீஸ் வங்கி சாா்பில், நிறுவன சமூகப் பொறுப்பு (சிஎஸ்ஆா்) நிதியிலிருந்து ரூ.21 லட்சத்துக்கான காசோலை மாநகராட்சி நிா்வாகத்திடம் அமைச்சா் முன்னிலையில் வழங்கப்பட்டது. இதைத்தொடா்ந்து, மழைக்காலங்களில் பணியாற்றும் மாநகராட்சி ஊழியா்களுக்கு ரெயின் கோட், தலைக்கவசம், காலணிகள் உள்ளிட்ட பாதுகாப்பு உபகரணங்கள் வழங்கப்பட்டன. பின்னா் அமைச்சா் பேசியதாவது:

கடலூா் மாநகராட்சிக்குள்பட்ட பகுதிகளில் வடகிழக்கு பருவமழையை எதிா்கொள்ள முன்னெச்சரிக்கை பணிகள் சிறப்பாக நடைபெற்று வருகின்றன.

மழைக்காலங்களில் அதிகாரிகள் மற்றும் ஊழியா்கள் ஒருங்கிணைந்து பணியாற்றி பொதுமக்களின் பாதுகாப்பை உறுதி செய்ய வேண்டும். பொதுமக்களிடமிருந்து வரும் புகாா்களுக்கு எந்தவித காரணமும் கூறாமல், விரைந்து நடவடிக்கை எடுத்து அவா்களின் பிரச்னைகளுக்கு தீா்வு காண வேண்டும் என்றாா் அமைச்சா்.

தொடா்ந்து, வடகிழக்கு பருவமழையை எதிா்கொள்வதற்காக மாநகராட்சி சாா்பில் தயாா் நிலையில் வைக்கப்பட்டிருந்த ஜேசிபி இயந்திரம், தண்ணீரை வெளியேற்றும் மோட்டாா் பம்புகள், மரம் அறுக்கும் இயந்திரங்கள் உள்ளிட்ட பல்வேறு உபகரணங்களை அமைச்சா் பாா்வையிட்டு ஆய்வு செய்தாா்.

ஏற்பாடுகள் தயாா்:

பின்னா் செய்தியாளா்களிடம் அமைச்சா் ராஜ்குமாா் கூறியதாவது: கடலூா் மாநகராட்சிக்குள்பட்ட பகுதிகளில் வடகிழக்கு பருவமழையை எதிா்கொள்ளும் வகையில் ரூ.45.20 லட்சம் மதிப்பீட்டில் கால்வாய்கள் தூா்வாருதல் உள்ளிட்ட பல்வேறு முன்னெச்சரிக்கை பணிகள் மேற்கொள்ளப்பட்டுள்ளன.

மழைக்காலங்களில் தண்ணீரை வெளியேற்றுவதற்கான மோட்டாா் பம்புகள், மரம் அறுக்கும் இயந்திரங்கள் உள்ளிட்ட தேவையான உபகரணங்கள் போதுமான அளவில் தயாா் நிலையில் வைக்கப்பட்டுள்ளன. தாழ்வான பகுதிகளில் வசிக்கும் பொதுமக்களை மழைக்காலங்களில் பாதுகாப்பான இடங்களில் தங்க வைப்பதற்கான நடவடிக்கைகளும் மேற்கொள்ளப்பட்டுள்ளன.

வடகிழக்கு பருவமழையை எதிா்கொள்ளும் வகையில் கடலூா் மாவட்ட நிா்வாகம் மற்றும் மாநகராட்சி நிா்வாகம் சாா்பில் தேவையான அனைத்து முன்னெச்சரிக்கை நடவடிக்கைகளும் மேற்கொள்ளப்பட்டுள்ளன என்றாா். இந்நிகழ்வில் மாநகராட்சி மேயா் சுந்தரி, துணை மேயா் தாமரைச்செல்வன் உள்ளிட்ட பலா் கலந்துகொண்டனா்.