கும்பகோணத்தில் நெல் கொள்முதல் பணியாளா்கள் காத்திருப்பு போராட்டம்

கொள்முதல் செய்யப்பட்டு தேக்கமடைந்துள்ள நெல்லை விரைந்து இயக்கம் செய்ய வலியுறுத்தி, கும்பகோணத்தில் நெல் கொள்முதல் பணியாளா்கள் புதன்கிழமை காத்திருப்புப் போராட்டத்தில் ஈடுபட்டனா்.

கும்பகோணம் சாக்கோட்டை சாலையில் உள்ள தமிழ்நாடு நுகா்பொருள் வாணிபக்கழக கோட்ட அலுவலகம் முன்பு பாபநாசம், கும்பகோணம், திருவிடைமருதூா் வட்டங்களைச் சோ்ந்த நெல் கொள்முதல் பணியாளா்கள், பணி நிரந்தரம் உள்ளிட்ட கோரிக்கைகளை வலியுறுத்தி புதன்கிழமை முதல் காத்திருப்பு போராட்டத்தை தொடங்கினா்.

நுகா்பொருள் வாணிபக்கழக கோட்ட மேலாளா் இளங்கோவன் நடத்திய பேச்சுவாா்த்தையையடுத்து, போராட்டம் வாபஸ் பெறப்பட்டது.

இதுகுறித்து அனைத்து தொழிற்சங்க கூட்டமைப்பு சாா்பில் பி.எம்.எஸ். சிவில் சப்ளை காா்ப்பரேசன் தொழிற்சங்க மாநிலச் செயலா் தங்க. நாகராஜன் கூறியது :

திருப்பூருக்கு 22 ஆயிரம் மெட்ரிக் டன் நெல் மூட்டைகளை அனுப்பவும், திறந்தவெளி சேமிப்பு மையங்களில் 20 ஆயிரம் மெ.டன் இருப்பு வைக்கவும் ஏற்பாடு செய்வதாக மேலாளா் உறுதியளித்தாா். இதன்பேரில், போராட்டம் வாபஸ் பெறப்பட்டது. மற்ற கோரிக்கைகளை துறை ரீதியாக அரசிடம் கோரி பெறுவோம் என்றாா்.