டி.என்.பி.எஸ்.சி தோ்வு: தாமதமாக வந்தவா்களுக்கு அனுமதி மறுப்பு

புதுக்கோட்டையில் சனிக்கிழமை நடைபெற்ற தமிழ்நாடு அரசுப் பணியாளா் தோ்வாணையத்தின் தொழில்நுட்பப் பணிகளுக்கான தோ்வுக்கு, காலதாமதமாக வந்த தோ்வா்களுக்கு அனுமதி மறுக்கப்பட்டது.

தமிழ்நாடு அரசுப் பணியாளா் தோ்வாணையத்தின் தொழில்நுட்பப் பணிகளுக்கான தோ்வு புதுக்கோட்டையில் கலைஞா் கருணாநிதி அரசு மகளிா் கல்லூரி மற்றும் அரசு மன்னா் கல்லூரி ஆகிய இடங்களில் நடைபெற்றது.

இதில், 2,392 போ் தோ்வெழுத விண்ணப்பித்திருந்தனா். காலை 9.30 மணிக்கு தோ்வு என்பதால், 9 மணிக்குள் உள்ளே வந்துவிட வேண்டும் என அறிவிக்கப்பட்டிருந்தது.

அதன்படி சனிக்கிழமை காலை 9.05 மணிக்கு தோ்வு வளாகம் பூட்டப்பட்டது. அதன்பிறகு கால தாமதமாக வந்த சுமாா் 30 தோ்வா்களுக்கு அனுமதி மறுக்கப்பட்டது. இதையடுத்து அவா்கள் கண்ணீருடன் வீட்டுக்குத் திரும்பினா்.