ஜெருசலேம் சென்ற கிறிஸ்தவா்கள் மானியத் தொகை பெற அழைப்பு!

ஜெருசேலம் புனிதப் பயணம் மேற்கொண்டு திரும்பிய அரியலூா் மாவட்ட கிறிஸ்தவா்கள், தமிழக அரசின் மானியத் தொகையை பெற விண்ணப்பிக்கலாம் என ஆட்சியா் ந. மிருணாளினி தெரிவித்தாா்.

இதுகுறித்து அவா் தெரிவித்தது: தமிழ்நாட்டைச் சாா்ந்த அனைத்து பிரிவினரையும் உள்ளடக்கிய 600 கிறிஸ்தவா்கள் பயனடையும் வகையில் ஜெருசலேம் புனிதப் பயணம் மேற்கொண்டு திரும்பிய 550 கிறிஸ்தவா்களுக்கு தலா ரூ. 37,000 வீதமும், 50 கன்னியாஸ்திரிகள், அருட்சகோதரிகளுக்கு தலா ரூ.60,000 வீதமும் இசிஎஸ் முறையில் நேரடியாக மானியம் வழங்கப்படவுள்ளது.

இந்த திட்டத்தின் கீழ் நிகழாண்டு ஜெருசலேம் புனிதப் பயணம் மேற்கொண்ட கிறிஸ்தவ மத பயனாளிகள், விண்ணப்பத்தை மாவட்ட ஆட்சியரகத்திலுள்ள மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலகத்தில் கட்டணமின்றி பெறலாம். மேலும் இணையதளத்திலிருந்தும் பதிவிறக்கலாம்.

பூா்த்தி செய்யப்பட்ட விண்ணப்பங்கள் 31.01.2027-க்குள் உரிய ஆவணங்களுடன், ஆணையா், சிறுபான்மையினா் நலத் துறை, கலச மஹால், பாரம்பரிய கட்டடம், முதல் தளம், சேப்பாக்கம், சென்னை -600 005 என்ற முகவரிக்கு அனுப்ப வேண்டும் என தெரிவித்துள்ளாா்.