கிறிஸ்தவா் அடையாளத்துடன் வரும் விஜய்யை ஏற்றுக்கொள்ள முடியாது: பொ்னாண்டஸ் ரத்தினராஜா

கிறிஸ்தவா் என்ற அடையாளத்துடன் தோ்தலுக்கு வருகிறேன் என்று கூறும் தவெக தலைவா் விஜய்யை எங்களால் ஏற்றுக்கொள்ள முடியாது என்று கிறிஸ்தவ நல அமைப்பின் மாநிலத் தலைவா் சி.பொ்னாண்டஸ் ரத்தினராஜா தெரிவித்தாா்.

திருச்சி - கரூா் புறவழிச் சாலையில் உள்ள விடுதியில், கிறிஸ்தவ நல அமைப்பின் மாநில செயற்குழுக் கூட்டம் செவ்வாய்க்கிழமை நடைபெற்றது. கூட்டத்துக்கு அந்த அமைப்பின் மாநிலத் தலைவா் வழக்குரைஞா் சி.பொ்னாண்டஸ் ரத்தினராஜா தலைமை வகித்து பேசினாா். நிகழ்ச்சியில் சிறப்பு விருந்தினராக பெரம்பலூா் மக்களவைத் தொகுதி உறுப்பினா் அருண் நேரு கலந்துகொண்டு பேசினாா்.

பின்னா், பொ்னாண்டஸ் ரத்தினராஜா செய்தியாளா்களிடம் கூறியதாவது: தமிழகத்தில் நல்லாட்சி வழங்கிக் கொண்டிருக்கும் முதல்வா் மு.க.ஸ்டாலின் தலைமையிலான கூட்டணிக்கு கிறிஸ்தவா்கள் அனைவரும் ஆதரவு தெரிவிப்பது என்றும், 234 தொகுதிகளிலும் களப்பணியாற்றுவது என்றும் தீா்மானம் நிறைவேற்றப்பட்டுள்ளது.

கிறிஸ்தவ மக்களுக்காக பேசுபவா்களாகவும், எல்லோரையும் அரவணைத்து செல்பவா்களாகவும் இருப்பவா்களைத்தான் நாங்கள் ஆதரிக்க முடியும்.

நேற்றுவரை தன்னுடைய தொழிலுக்கு முக்கியத்துவம் கொடுத்துவிட்டு, தற்போது தோ்தலுக்காக கிறிஸ்தவா் என்ற அடையாளத்தோடு வருகிறேன் என்று விஜய் கூறுவதை எங்களால் ஏற்றுக்கொள்ள முடியாது.

பெண்கள், மாணவா்கள் என அனைவருக்கும் பல்வேறு நலத் திட்டங்களை வழங்கி, மதக் கலவரங்களை ஒடுக்குகின்ற கட்சியாகவும், ஆட்சியாகவும் திமுக உள்ளது. எனவே, திமுக தலைமையிலான கூட்டணிக்குத்தான் எங்கள் ஆதரவு என்றாா்.

கூட்டத்தில், ஏஐசிசி அமைப்பின் பேராயா் மோகன்தாஸ், செயலாளா் சாம் ஜெபதுரை, சுயாதீன திருச்சபைகளின் நிா்வாகி டேனியல் வின்சென்ட், கன்னியாகுமாரி துணைச் செயலா் பைஜி, தமிழக ஆயா் பேரவையின் மாநிலச் செயலா் அருட்தந்தை பெனடிக் உள்ளிட்ட பலா் கலந்து கொண்டனா்.