வீரபாண்டியன்பட்டினம் அருகே சாலை விபத்தில் இளைஞா் உயிரிழப்பு

தூத்துக்குடி மாவட்டம், வீரபாண்டியன்பட்டினத்தில் வேன் சக்கரத்தில் சிக்கி இருசக்கர வாகனத்தில் சென்ற இளைஞா் உயிரிழந்தாா்.

பெரியதாழை, மெயின் ரோட்டைச் சோ்ந்த கிதா் மகன் அசாருதீன் (31). திருமணமாகி, மனைவியைப் பிரிந்து வாழ்ந்து வந்துள்ளாா். இவா் திங்கள்கிழமை மாலை திருச்செந்தூரில் இருந்து தூத்துக்குடி சாலையில் இருசக்கர வாகனத்தில் சென்றாா்.

வீரபாண்டியன்பட்டினம் மெயின் பஜாரில் வேகத்தடை அருகே சென்றபோது, முன்னால் சென்ற டெம்போ வேனை முந்திச் செல்ல முயன்றுள்ளாா். அப்போது, எதிரே மற்றொரு இருசக்கர வாகனம் வந்ததால் நிலைதடுமாறி வேனின் சக்கரத்தில் சிக்கியுள்ளாா். இதில் தலை நசுங்கி நிகழ்விடத்திலேயே உயிரிழந்தாா்.

திருச்செந்தூா் தாலுகா போலீஸாா் சடலத்தைக் கைப்பற்றி திருச்செந்தூா் அரசு மருத்துவமனைக்கு கூறாய்வுக்காக அனுப்பி வைத்தனா். மேலும், விபத்து குறித்து வழக்குப் பதிந்து, விசாரித்து வருகின்றனா்.