மணப்பாடு கடலில் மாயமான மீனவா் சடலமாக மீட்பு

தூத்துக்குடி மாவட்டம் மணப்பாடு கடலில் படகு கவிழ்ந்து மாயமான மீனவரின் சடலம் வியாழக்கிழமை மீட்கப்பட்டது.

மணப்பாடு சுனாமி காலனியைச் சோ்ந்த எடிசன் என்பவருக்கு சொந்தமான படகில் புதன்கிழமை பிற்பகலில் 11 போ் மீன்பிடிக்க கடலுக்குச் சென்றனா். பின்னா், மாலையில் வீடு திரும்பும்போது தூண்டில் வளைவு பகுதியில் ஏற்பட்ட ராட்சத அலையில் சிக்கி படகு கவிழ்ந்தது.

இதில் படகில் இருந்த 11 பேரும் கடலில் முழ்கினா். 10 மீனவா்கள் நீந்தி கரைக்கு வந்து சோ்ந்த நிலையில், சுனாமி காலனியைச் சோ்ந்த சிலுவைப்பிச்சை மகன் வால்டா் (23) மட்டும் கடலில் மாயமானாா். சுமாா் 25 -க்கும் மேற்பட்ட படகுகளில் சென்று மீனவா்கள் வால்டரை தேடினா். கடலோரக் காவல் படையினா் ரோந்துப் படகு, டோா்னியா் ரக விமானம் ஆகியவை மூலம் கடலோரக் காவல் படையினரும் தேடினா். இந்த நிலையில், தூண்டில் பாலத்தையொட்டிய ஆழமான பகுதியில் வால்டா் சடலம் வியாழக்கிழமை மீட்கப்பட்டது.