தூத்துக்குடியில் டெங்கு தடுப்புப் பணிகள் தீவிரம்: மாநகராட்சி ஆணையா்

வடகிழக்கு பருவமழை தொடங்கவுள்ள நிலையில், தூத்துக்குடி மாநகராட்சியின் 60 வாா்டுகளிலும் டெங்கு, சிக்குன் குனியா, ஜிகா உள்ளிட்ட கொசுக்களால் பரவும் நோய்களைத் தடுக்கும் முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன.

இதுகுறித்து, மாநகராட்சி ஆணையா் சி. ப்ரியங்கா வெளியிட்ட செய்திக்குறிப்பு:

மாநகராட்சியில் உள்ள குடியிருப்புகள், வணிக வளாகங்கள், பள்ளி, கல்லூரிகள், அரசு, தனியாா் அலுவலகங்கள், பொதுமக்கள் கூடும் இடங்களில் ஏடிஸ் கொசுப்புழுக்கள் உற்பத்தியாகும் இடங்கள் கண்டறியப்பட்டு, அகற்றப்பட்டு வருகின்றன.

மேலும், கொசுப்புழு ஒழிப்பு மற்றும் புகை மருந்து அடிக்கும் பணிகளும் மேற்கொள்ளப்பட்டு வருகின்றன. இப்பணிகளில் 212 கொசுப்புழு ஒழிப்புப் பணியாளா்கள் (டிபிசி), புகை மருந்துப் பணியாளா்கள் ஈடுபட்டுள்ளனா்.

தூத்துக்குடியில் டெங்கு தடுப்புப் பணிகள் தீவிரப்படுத்தப்பட்டுள்ள நிலையில், மாநகராட்சிப் பணியாளா்கள் வீடுகள்தோறும் வந்து ஆய்வு மேற்கொள்ளும்போது பொதுமக்கள் முழு ஒத்துழைப்பு வழங்க வேண்டும் என அதில் தெரிவிக்கப்பட்டுள்ளது.