உண்டியல் காணிக்கை திருட்டு

தூத்துக்குடியில் பிரசித்தி பெற்ற புனித செபஸ்தியாா் கெபியின் உண்டியலை உடைத்து, காணிக்கையைத் திருடிச் சென்ற மா்ம நபா்களை போலீஸாா் தேடி வருகின்றனா்.

தூத்துக்குடி, பூபால்ராயபுரம் முதலாவது தெருவைச் சோ்ந்த மாா்ட்டின் மகன் அந்தோணி ராஜ் (51). இவா் சந்தன மாரியம்மன் கோயில் தெரு பண்டுகரைச் சாலையில் உள்ள புனித செபஸ்தியாா் கெபியின் முக்கியப் பொறுப்பாளராக இருந்து வருகிறாா்.

இதற்கிடையே, சனிக்கிழமை நள்ளிரவில் அடையாளம் தெரியாத மா்ம நபா்கள் சிலா் கெபி வளாகத்துக்குள் அத்துமீறி நுழைந்து அங்கிருந்த உண்டியலை உடைத்து, காணிக்கையைத் திருடிச் சென்றனா்.

ஞாயிற்றுக்கிழமை காலை பொறுப்பாளா் அந்தோணி ராஜ் கெபிக்கு வந்த போது, உண்டியல் உடைக்கப்பட்டு காணிக்கை பணம் திருடப்பட்டிருந்தது தெரியவந்தது. இதுகுறித்த புகாரின் பேரில், தூத்துக்குடி வடபாகம் காவல் நிலைய போலீஸாா் வழக்குப் பதிந்து, காணிக்கையைத் திருடிச் சென்ற நபரைத் தேடி வருகின்றனா்.