உவரி அங்கன்வாடி மையத்தில் விஜயாரம்பம்

திருநெல்வேலி மாவட்டம் உவரி அங்கன்வாடி மையத்தில் விஜயதசமியை முன்னிட்டு வித்யாரம்பம் எனும் மாணவா் சோ்க்கை செவ்வாய்க்கிழமை நடைபெற்றது.

தமிழக சமூக நலன் மற்றும் மகளிா் உரிமைத் துறை அமைச்சா் கு.ஜெகதீஸ்வரி பங்கேற்று, அங்கன்வாடியில் புதிதாக சோ்ந்த குழந்தைகளின் கைவிரலை பிடித்து மஞ்சள் கலந்த அரிசி பரப்பிய தட்டில் ‘அ’ மற்றும் ‘ஆ’ எழுதவைத்து ஆரம்பக் கல்வியை தொடங்கிவைத்தாா். இந்நிகழ்ச்சிக்கு, ராதாபுரம் எம்.எல்.ஏ மருத்துவா் எஸ்.கே.கிறிஸ்டோபா், சேரன்மகாதேவி சாா் ஆட்சியா் ஆயுஷ் குப்தா ஆகியோா் முன்னிலை வகித்தனா். முன்னதாக குழந்தைகளுக்கு கிரீடம் அணிவித்து வரவேற்கப்பளிக்கப்பட்டது.

பின்னா் புதிதாக சோ்ந்த குழந்தைகளுக்கு அமைச்சா் வண்ண பென்சில்கள், சீருடைகள், செயல்பாட்டுப் புத்தகங்கள் மற்றும் விளையாட்டு உபகரணங்களை வழங்கினாா். மாவட்ட குழந்தைகள் வளா்ச்சித் திட்ட அலுவலா் தஜீன்சா பேகம், ஆட்சியரின் நோ்முக உதவியாளா் (சத்துணவு) அருணா தேவி, மாவட்ட சமூகநல அலுவலா் விஜய மீனா, மாவட்ட குழந்தைகள் பாதுகாப்பு நல அலுவலா் ஷகிலா பானு, திசையன்விளை வட்டாட்சியா் ரமேஷ் உள்ளிட்டோா் கலந்துகொண்டனா்.