மக்கள் நிலங்களை கோயிலுக்குரியதாக அறிவிப்பதா? ஆட்சியரிடம் எம்எல்ஏ புகாா்

தென்காசி மாவட்டம் சங்கரன்கோவிலில் மக்கள் நிலங்களை கோயில் நிலங்கள் என அறிவித்துள்ளதாகவும், வழிகாட்டி மதிப்பு பூஜ்ஜியமாக்கியதை ரத்து செய்யக்கோரியும் மாவட்ட ஆட்சியரிடம், அந்தத் தொகுதி அதிமுக எம்எல்ஏ திலீபன் ஜெய்சங்கா் செவ்வாய்க்கிழமை மனு அளித்தாா்.

அதன் விவரம்: சங்கரன்கோவில் மற்றும் சுற்றுவட்டார பகுதிகளில் உள்ள பல கிராமங்களில் பொதுமக்கள் தலைமுறை தலைமுறையாக வாழ்ந்து வரும் சொந்த நிலங்களையும் விவசாய நிலங்களையும் சங்கரநாராயண சுவாமி கோயில் நிலங்கள் என இந்து சமய அறநிலையத்துறை சமீபத்தில் அறிவித்தது.

அதன் தொடா்ச்சியாக சாா் பதிவாளா் அலுவலகத்தில் அந்த நிலங்களுக்கான வழிகாட்டி மதிப்பு பூஜ்ஜியமாக மாற்றப்பட்டுள்ளது. இந்த நடவடிக்கையால் பொதுமக்கள் தங்கள் சொந்த நிலங்களை விற்கவோ, அடமானம் வைக்கவோ, தங்களது வாரிசுகளுக்கு பிரித்து கொடுக்க முடியாமல் நெருக்கடிக்கு உள்ளாகியுள்ளனா்.

இந்த குறிப்பிட்ட நிலங்கள் கோயிலுக்குச் சொந்தமானது என்பதற்கான கிரய ஆவணங்களோ அல்லது இதர ஆவணங்களோ இந்து சமய அறநிலையத்துறையிடமோ, கோயில் நிா்வாகத்திடமோ இல்லை. இந்த நிலங்கள் கிராமத்து மக்களிடம் அரசு வழங்கிய பட்டாக்கள், தீா்வை ரசீதுகள் மற்றும் அசல் ஆவணங்கள் மூலம் அவா்களது பெயரிலேயே உள்ளது தெரியவந்துள்ளது.

வருவாய்த்துறை ஆவணங்கள் அனைத்தும் பொதுமக்கள் வசம் இருக்கும் நிலையில் இந்துசமய அறநிலையத்துறை எவ்வித ஆவணங்களும் இன்றி பொதுமக்கள் நிலங்களை முடக்கி வைத்திருப்பதை ஏற்க முடியாது. எனவே, மாவட்ட ஆட்சியா் இந்த விவகாரத்தில் தலையிட்டு உரிய விசாரணை நடத்த வேண்டும். அத்துடன் சாா் பதிவாளா் அலுவலகத்தில் நிலமதிப்பு பூஜ்ஜியமாக இருப்பதை ரத்து செய்து நிலங்களை மீண்டும் அந்த மக்கள் முழுமையாக பயன்படுத்தும் வகையில் நடவடிக்கை எடுக்க வேண்டும் எனக் கூறப்பட்டுள்ளது.

மனு அளித்தபோது, மாவட்ட எம்ஜிஆா் இளைஞரணிச் செயலா் சந்திரன், ஜெயலலிதா பேரவைப் பொருளாளா் பாலாஜி, மானூா் வடக்கு ஒன்றிய துணைச் செயலா் மதுரம் ஆகியோா் உடனிருந்தனா்.