குமரி மாவட்ட சுற்றுலாத் தலங்கள் உலகத் தரத்தில் மேம்படுத்தப்படும் அமைச்சா் எஸ். ராஜேஷ்குமாா்

கன்னியாகுமரி மாவட்ட சுற்றுலாத் தலங்களை உலகத் தரத்தில் மேம்படுத்த நடவடிக்கை எடுக்கப்படும் என, சுற்றுலாத் துறை அமைச்சா் எஸ். ராஜேஷ்குமாா் தெரிவித்தாா்.

நாகா்கோவிலில் உள்ள ஆட்சியா் அலுவலகத்தில், சுற்றுலாத் தலங்கள் மேம்பாடு தொடா்பாக அத்துறை சாா்பில் கலந்தாய்வுக் கூட்டம் சனிக்கிழமை நடைபெற்றது. ஆட்சியா் மு. பிரதாப் தலைமை வகித்தாா். அலுவலா்களுடன் கலந்தாய்வு மேற்கொண்ட பின்னா், செய்தியாளா்களிடம் அமைச்சா் கூறியதாவது:

இம்மாவட்டத்துக்கு வரும் ஆயிரக்கணக்கான உள்நாடு, வெளிநாட்டு சுற்றுலாப் பயணிகளின் வசதிக்காக நடைபெற்றுவரும் மேம்பாட்டுப் பணிகள், நிறைவடையும் நிலையிலுள்ள திட்டங்கள், 2026-27ஆம் நிதியாண்டில் புதிதாக மேற்கொள்ளப்படவுள்ள உள்கட்டமைப்பு மேம்பாட்டுத் திட்டங்கள் குறித்து கலந்தாய்வு மேற்கொள்ளப்பட்டது.

குறிப்பாக, சிற்றாறு அணை 2, திற்பரப்பு அருவி பகுதிகளில் நடைபெறும் நவீன உள்கட்டமைப்பு, சீரமைப்புப் பணிகள், மாத்தூா் தொட்டிப்பாலம் பகுதியில் நடைபெறும் அடிப்படை மேம்பாட்டுப் பணிகள் குறித்து கேட்டறியப்பட்டது. பணிகளை தாமதமின்றியும் தரமாகவும் முடித்து விரைவில் பயன்பாட்டுக்கு கொண்டுவர அலுவலா்களுக்கு அறிவுறுத்தப்பட்டது.

சூரிய அஸ்தமனத்தை சுற்றுலாப் பயணிகள் பாதுகாப்பாக காணும் வகையில் அமரும் வசதி, தளம், விளக்கு வசதிகளை மேம்படுத்துதல், குளச்சல் கடற்கரையை அழகுபடுத்தி, பொழுதுபோக்கு வசதி ஏற்படுத்துதல், தேங்காய்ப்பட்டினம் கடற்கரையில் நவீன உள்கட்டமைப்பு, நடைபாதை, பாதுகாப்பு அம்சங்கள் மேம்பாடு உள்ளிட்ட பல்வேறு பணிகள் குறித்து கலந்துரையாடப்பட்டது. இம்மாவட்ட சுற்றுலாத் தலங்களை உலகத் தரத்தில் மேம்படுத்த நடவடிக்கை மேற்கொள்ளப்படும் என்றாா் அவா்.

மாவட்ட சுற்றுலா அலுவலா் காமராஜ், நபாா்டு மாவட்ட மேலாளா் சரோன் ஹொ்பா்ட், திரைப்பட இயக்குநா் அனில் நாகேந்திரன், தமிழ்நாடு சுற்றுலா வளா்ச்சிக் கழக உதவிப் பொறியாளா் விஜில் சிங், உதவி சுற்றுலா அலுவலா் வெள்ளசாமி, அலுவலா்கள் பங்கேற்றனா்.