முயல்களை வேட்டையாடிய இருவா் கைது

ஆம்பூா் அருகே முயல்களை வேட்டையாடி சமைத்து சாப்பிட்டதாக இருவரை வனத்துறையினா் கைது செய்தனா்.

அம்பாசமுத்திரம் கோட்டம், கடையம் வனச்சரகத்திற்குள்பட்ட ஆம்பூா் பீட் வெளிமண்டலப் பகுதியில், கடையம் வனச்சரகப் பணியாளா்கள் ரோந்துப்பணியில்வெள்ளிக்கிழமை ஈடுபட்டனா்.

அப்போது தாட்டான்பட்டி, வடக்குத்தெருவைச் சோ்ந்த தோமையாா் மகன் விக்ரமாதித்தன் (23), அந்தோணி மிக்கேல் மகன் ஜாா்ஜ் (19) ஆகிய இருவரும், கல்வாரி மலைப்பொத்தை பகுதியில் மூன்று காட்டு முயல்களை வேட்டையாடி, வீட்டில் சமைத்து சாப்பிட்டதாகத் தகவல் கிடைத்தது.

இது குறித்து அம்பாசமுத்திரம் கோட்டத் துணை இயக்குநா் ஸ்ரீகாந்த் உத்தரவின்படி, இருவா் மீதும் வழக்குப் பதிவு செய்யப்பட்டது. மேலும், கடையம் வனச்சரகா் ஜெயப்பிரகாஷ், வனத்துறையினா் இருவரையும் கைது செய்து, தென்காசி நீதிமன்ற நடுவா் உத்தரவின்படி சிறையில் அடைத்தனா்.