பள்ளி பாடநூல் அச்சிடுவதில் முறைகேடு! ஆம் ஆத்மி குற்றச்சாட்டு, பாஜக மறுப்பு!

தில்லி அரசு பள்ளி மாணவா்களுக்கான இலவச பாடநூல்களை அச்சிடுவதில் 40 சதவீதம் ‘கமிஷன்’ பெறப்பட்டுள்ளதாகவும், தரம் குறைந்த தாளில் புத்தகங்கள் அச்சிடப்பட்டுள்ளதாகவும் ஆம் ஆத்மி கட்சி குற்றஞ்சாட்டியுள்ளது. இதற்கு பாஜக தரப்பில் மறுப்பு தெரிவிக்கப்பட்டுள்ளது.

இது குறித்து தில்லியில் ஆம் ஆத்மி கட்சியின் தில்லி பிரிவு தலைவா் செளரவ் பரத்வாஜ் செய்தியாளா்களிடம் வெள்ளிக்கிழமை கூறியதாவது: தில்லி பள்ளிகளில் 1 முதல் 8-ஆம் வகுப்பு மாணவா்களுக்கான பாடநூல் ஒப்பந்தத்தில் குறிப்பிடப்பட்ட எந்தவொரு விதிமுறையும் சரியாக பின்பற்றப்படவில்லை

ஒப்பந்தப்படி ஏ4 அளவு மற்றும் 80 ஜிஎஸ்எம் தரம் கொண்ட தாள் பயன்படுத்தப்படும் என்று கூறப்பட்ட நிலையில், அரசு வழங்கிய புத்தகங்கள் 60 ஜிஎஸ்எம் தரம் கொண்ட மெல்லிய மற்றும் சாம்பல் நிற தாளில் அச்சிடப்பட்டுள்ளன. இதனால் மாணவா்களுக்குப் படிப்பதில் சிரமம் ஏற்படும். கொள்முதல் செயல்பாட்டில் குறைந்தது 40 சதவீத அளவுக்கு முறைகேடு நடந்துள்ளது என்றாா் அவா்.

பாஜக மறுப்பு: இந்த நிலையில், ஆம் ஆத்மியின் குற்றச்சாட்டுகள் ‘அரசியல் நோக்கம் கொண்டவை’என்று தில்லி பாஜக செய்தித் தொடா்பாளா் பிரவீன் சங்கா் கபூா் தெரிவித்தாா்.இது குறித்து அவா் மேலும் கூறுகையில், அரவிந்த் கேஜரிவால் தலைமையிலான முந்தைய ஆட்சியில், கல்வியாண்டு முழுவதும் மாணவா்களுக்கு பாடநூல்கள் கிடைக்காமல் நீதிமன்றங்களின் கண்டனங்களைச் சந்தித்ததை அவா் சுட்டிக்காட்டினாா். கடந்த இரண்டு ஆண்டுகளாக பாஜக அரசு மாணவா்களுக்குத் தடையின்றிப் பாடநூல்களை வழங்கி வருவதாகவும் அவா் கூறினாா்.