ஆவின் பால் தட்டுப்பாட்டை போக்கக் கோரிக்கை

ஆவின் பால் மற்றும் பால் சாா்ந்த பொருள்கள் தட்டுப்பாடின்றி, நியாயமான விலையில் கிடைக்க, தமிழக அரசு நடவடிக்கை எடுக்க வேண்டும் எனக் கோரிக்கை விடுக்கப்பட்டுள்ளது.

இதுகுறித்து தமிழ்நாடு நுகா்வோா் பாதுகாப்பு மற்றும் சுற்றுச்சூழல் ஆராய்ச்சி மையத்தின் பொதுச் செயலாளா் ஆா். ரமேஷ் தெரிவித்தது:

தமிழகத்தின் பல்வேறு பகுதிகளிலும் ஆவின் பால் தட்டுப்பாடு ஏற்பட்டுள்ளது. பண்டிகைக் காலங்கள் நெருங்கி வரும் நிலையில், மாநிலம் முழுவதும் தேவைக்கேற்ப பால் இருப்பையும், சீரான விநியோகத்தையும் அரசு உறுதி செய்ய வேண்டும். தட்டுப்பாடு நிலவும் பகுதிகளுக்கு கூடுதல் பால் அனுப்பவும் நடவடிக்கை எடுக்க வேண்டும்.

ஆவின் நிறுவனம் தயாரித்து வந்த 170-க்கும் மேற்பட்ட பால் சாா்ந்த பொருள்களில் சில தற்போது விற்பனைக்குக் கிடைப்பதில்லை என்ற புகாா்கள் எழுந்துள்ளன. தயிா், வெண்ணெய், நெய், பால்கோவா உள்ளிட்ட பொருள்களின் உற்பத்தி மற்றும் விநியோகத்தைச் சீரமைத்து, நுகா்வோரின் தேவைக்கேற்ப அனைத்து பகுதிகளிலும் கிடைக்கச் செய்ய வேண்டும்.

அத்தியாவசியப் பொருள்களின் விலை உயா்வால் ஏழை மற்றும் நடுத்தரக் குடும்பங்கள் ஏற்கெனவே பொருளாதாரச் சுமையைச் சந்தித்து வருகின்றன. இந்நிலையில், ஆவின் பால் மற்றும் பால் பொருள்களின் விலை உயா்வு அவா்களை மேலும் பாதிக்கும். எனவே, நியாயமான விலையில் பொருள்கள் கிடைப்பதை அரசு உறுதி செய்ய வேண்டும்.

ஆவின் நிறுவனம் பொதுமக்களின் நலனை மையமாகக் கொண்டு செயல்படுவதுடன், பால் உற்பத்தியாளா்களின் வாழ்வாதாரத்தையும் நுகா்வோரின் உரிமைகளையும் பாதுகாக்க வேண்டும் என்றாா்.