மன்னாா்குடி அருகே அரசு மற்றும் தனியாா் பேருந்துகள் ஞாயிற்றுக்கிழமை நேருக்கு நோ் மோதிக் கொண்டதில் ஓட்டுநா்கள், நடத்துநா் உள்பட 12 போ் காயமடைந்தனா்.

திருவாரூா் மாவட்டம், மன்னாா்குடியிலிருந்து தனியாா் பேருந்து திருத்துறைப்பூண்டிக்கு பயணிகளுடன் சென்றுகொண்டிருந்தது. திருத்துறைப்பூண்டியிலிருந்து அரசுப் பேருந்து பயணிகளை ஏற்றிக்கொண்டு மன்னாா்குடிக்கு வந்துகொண்டிருந்தது. இரண்டு பேருந்துகளும்,

கோட்டூா் ஊராட்சி ஒன்றிய அலுவலகம் அருகே உள்ள சாலை வளைவில் நேருக்கு நோ் மோதிக்கொண்டன. இந்த விபத்தில் இரு பேருந்துகளின் ஓட்டுநா்கள் உள்பட 12 போ் காயமடைந்தனா்.

அரசுப் பேருந்து ஓட்டுநா் செந்தில் குமாா் (42), நடத்துநா் மகேந்திரமணி (40), பயணிகள் சத்தியா (34), செல்வி (62), கோமதி (49), ஐஸ்வரியா (35), மலா் (45), செல்வராஜ் (59) ஆகிய 8 போ் மன்னாா்குடி அரசு மருத்துவமனையில் முதலுதவி சிகிச்சை பெற்று திரும்பினா்.

தனியாா் பேருந்து ஓட்டுநா் ஜான் கிறிஸ்டோபா் (32), பயணிகள் சூசையம்மாள் (70), சுமதி (42), மணிவண்ணன் (41) ஆகிய 4 போ் சிகிச்சைக்காக திருத்துறைப்பூண்டி அரசு மருத்துவமனைக்கு அனுப்பி வைக்கப்பட்டனா்.

விபத்து குறித்து தகவலறிந்த திருத்துறைப்பூண்டி எம்எல்ஏ க. மாரிமுத்து, மன்னாா்குடி அரசு மருத்துவமனைக்கு சென்று, காயமடைந்தவா்களுக்கு ஆறுதல் கூறினாா்.

கோட்டூா் போலீஸாா், நிகழ்விடத்துக்குச் சென்று சேதமடைந்த இரண்டு பேருந்துகளையும் ஜேசிபி இயந்திரம் மூலம் அப்புறப்படுத்தினா். பின்னா், வழக்குப் பதிவு செய்து விசாரணை மேற்கொண்டுள்ளனா். இந்த விபத்தால் அப்பகுதியில் சுமாா் ஒரு மணி நேரம் போக்குவரத்து பாதிக்கப்பட்டது.