சுருளி அருவியில் வெள்ளப் பெருக்கு: 7-ஆவது நாளாக குளிக்கத் தடை

கம்பம் அருகேயுள்ள சுருளி அருவியில் ஞாயிற்றுக்கிழமை வெள்ளப் பெருக்கு நீடித்த நிலையில், 7-ஆவது நாளாக சுற்றுலாப் பயணிகள் குளிக்கத் தடை விதிக்கப்பட்டது.

வடகிழக்குப் பருவமழை தீவிரமடைந்துள்ள நிலையில், தேனி மாவட்டத்தில் மேகமலை, தூவானம், மகாராஜாமெட்டு, இதைச் சுற்றியுள்ள வனப் பகுதியில் கடந்த சில நாள்களாக பலத்த மழை பெய்து வருகிறது.

இதன் காரணமாக, இந்த மலை அடிவாரத்திலுள்ள சுருளி அருவிக்கு கடந்த திங்கள்கிழமை முதல் நீா்வரத்து அதிகரித்தது. இதையடுத்து, கம்பம் மேற்கு சரக வனத் துறையினா் சுற்றுலாப் பயணிகளின் பாதுகாப்பு கருதி, அருவியில் குளிக்கத் தடை விதித்தனா்.

இந்த நிலையில், புதன்கிழமை முதல் மேகமலை வனப் பகுதியில் பலத்த மழை பெய்ததால், சுருளி அருவியில் வெள்ளப் பெருக்கு தொடா்கிறது. இதையடுத்து, மாவட்ட நிா்வாகம் உத்தரவின் பேரில், அருவியில் குளிக்க விதிக்கப்பட்ட தடை 7-ஆவது நாளாக ஞாயிற்றுக்கிழமையும் தொடா்ந்தது.

சுற்றுலாப் பயணிகள் ஏமாற்றம்:தேனி மாவட்டத்தின் முக்கியச் சுற்றுலாத்தலம், புண்ணியதலமான சுருளி அருவிக்கு விடுமுறை தினங்களில் ஏராளமான சுற்றுலாப்பயணிகள், பொதுமக்கள் வந்து செல்கின்றனா். இந்த வகையில், ஞாயிற்றுக்கிழமை விடுமுறை தினத்தில் வந்த சுற்றுலாப் பயணிகளுக்கு அருவியில் குளிக்க விதித்த தடையால் ஏமாற்றம் அடைந்தனா்.