மேகமலை விவசாயிகளை வெளியேற்றும் நடவடிக்கைகளை நிறுத்த வலியுறுத்தல்

உச்சநீதிமன்ற உத்தரவின்படி, தேனி மாவட்டம், மேகமலை வனப் பகுதியிலிருந்து விவசாயிகளை வெளியேற்ற எடுக்கப்படும் நடவடிக்கைகளை உடனடியாக நிறுத்த வலியுறுத்தி, மாவட்ட ஆட்சியரிடம் தேனி மாவட்டம், தும்மகுண்டு கிராம பாரம்பரிய வனவாசிகளின் உரிமைகள் பாதுகாப்புச் சங்கத்தினா் மனு அளித்தனா்.

மனு விவரம்: மூன்று நீதிபதிகள் கொண்ட உச்சநீதிமன்ற உத்தரவுக்கு மதிப்பளித்து மேகமலை விவசாயிகளை வெளியேற்ற எடுக்கப்படும் அனைத்து நடவடிக்கைகளையும் உடனடியாக நிறுத்த வேண்டும். எங்கள் முந்தைய அனைத்து மனுக்களையும் அரசின் கவனத்துக்கு அரசு வழக்குரைஞா் மூலம் நீதிமன்றத்தின் கவனத்துக்கும், சிஇசி கவனத்துக்கும் கொண்டு வர வேண்டும்.

பாதிக்கப்பட்ட மக்களிடையே பரவியுள்ள பரவலான தவறான தகவல்களையும், மன உளைச்சலையும் போக்க உண்மையான சட்ட நிலைப்பாட்டை விளக்கும் அறிக்கை வெளியிட வேண்டும். முந்தைய மனுக்களில் கோரப்பட்ட அனைத்து வேண்டுகோள்களையும் அமல்படுத்த வேண்டும் என அதில் குறிப்பிடப்பட்டது.