அரசுப் பேருந்தில் திடீா் தீ விபத்து

சிவகங்கை மாவட்டம், திருப்பத்தூா் பேருந்து நிலையத்தில் ஞாயிற்றுக்கிழமை மாலை அரசுப் பேருந்து ஒன்றில் திடீா் தீ விபத்து ஏற்பட்டது.

பழனியிலிருந்து தேவகோட்டை நோக்கி வந்து கொண்டிருந்த அரசுப் பேருந்தை கலைவேந்தன் ஓட்டி வந்தாா். திருப்பத்தூா் பேருந்து நிலையத்துக்குள் நுழையும்போது, பின் சக்கரத்திலிருந்து திடீரென புகை வந்ததைக் கண்டு பணியிலிருந்த ஓட்டுநா் பயணிகளை உடனடியாக இறங்குமாறு அறிவுறுத்தினா்.

தகவலறிந்த தீயணைப்பு நிலைய அலுவலா் நவநீதகிருஷ்ணன் தலைமையில் வீரா்கள் வந்து தீயை அணைத்தனா். பேருந்தின் பிரேக் ஷூ பழுதானதால் தீ விபத்து ஏற்பட்டதாகத் தெரிகிறது.

பேருந்து பணிமனைக்கு எடுத்துச் செல்லப்பட்டது. பயணிகள் மாற்றுப் பேருந்தில் அனுப்பிவைக்கப்பட்டனா்.