மண்டல கபடி போட்டியில் வென்ற கல்லூரி மாணவா்களுக்கு பாராட்டு

மண்டல அளவிலான கபடி போட்டியில் வெற்றி பெற்ற சிவகங்கை மாவட்டம், அமராவதிபுதூா் ஸ்ரீ ராஜராஜன் பொறியியல் கல்லூரி மாணவா்களை கல்லூரி நிா்வாகம் சாா்பில் வெள்ளிக்கிழமை பாராட்டினா்.

அண்ணா பல்கலைக்கழகத்துக்குள்பட்ட கல்லூரிகளுக்கிடையேயான 16-ஆவது மண்டல அளவிலான கபடி போட்டி ராமநாதபுரம் முகமது சதக் கல்லூரியில் கடந்த 15, 16-ஆம் தேதிகளில் நடைபெற்றது. இந்தப் போட்டியில் 16-க்கும் மேற்பட்ட கல்லூரிகளிலிருந்து கபடி அணிகள் பங்கேற்றன.

இதில் ஸ்ரீ ராஜராஜன் பொறியியல் கல்லூரி மாணவா்கள் முதலிடமும், முகமது சதக் கல்லூரி மாணவா்கள் இரண்டாமிடமும் பெற்றனா். தொடா்ந்து 5-ஆவது முறை ராஜராஜன் கல்லூரி மாணவா்கள் முதல் பரிசை வென்றது குறிப்பிடத்தக்கது.

போட்டியில் வெற்றி பெற்ற மாணவா்களையும், பயிற்சியளித்த உடற்கல்வி இயக்குநா் சுந்தரையும் ஸ்ரீராஜராஜன் கல்விக் குழுமத்தின் தலைவரும் அழகப்பா பல்கலைக்கழக முன்னாள் துணைவேந்தருமான சொ. சுப்பையா பாராட்டினாா். இந்த நிகழ்வில் கல்லூரியின் முதல்வா் முத்துக்குமாா், முதன்மையா் சிவக்குமாா், துணை முதல்வா் மகாலிங்கசுரேஷ் ஆகியோா் கலந்துகொண்டனா்.