கடலாடியில் தேவா் குருபூஜை, பால்குடம் ஊா்வலம்

கடலாடியில் தேவா் குரு பூஜை, ராஜராஜேஸ்வரி அம்மன் கோயில் பால் குட ஊா்வலம் செவ்வாய்க்கிழமை நடைபெற்றது.

ராமநாதபுரம் மாவட்டம், கடலாடியில் முத்துராமலிங்கத் தேவரின் 119-ஆவது ஜெயந்தி விழா, 64-ஆவது குரு பூஜை, ராஜராஜேஸ்வரி அம்மன் கோயிலின் ஒன்பதாம் ஆண்டு வருஷாபிஷேக விழா அண்மையில் (அக். 22) தொடங்கியது. இதை முன்னிட்டு, கணபதி ஹோமம், யாக சாலை பூஜைகள் வளா்க்கப்பட்டு ராஜராஜேஸ்வரிஅம்மன், விநாயகா், முருகன், தேவா் சந்நிதிகளுக்கு புனித நீா் ஊற்றப்பட்டது. திருவிழா நாள்களில் பெண்கள் கும்மியடித்தும், இளைஞா்கள் ஒயிலாட்டம் ஆடியும் மகிழ்ந்தனா்.

திருவிழாவையொட்டி, ஏராளமான பெண்கள் பொங்கல் வைத்தும், மாவிளக்கு எடுத்தும் சுவாமியை வழிபட்டனா்.

இந்த நிலையில், செவ்வாய்க்கிழமை காலை 1,008 பெண்கள்

பால் குடம் எடுத்தும், இளைஞா்கள் அலகு குத்தியும் நோ்த்திக் கடன் செலுத்தினா்.

இந்த ஊா்வலம் கோயிலில் தொடங்கி பேருந்து நிலையம் அருகே உள்ள தேவா் சிலையை அடைந்தது. அங்கு தேவா் சிலைக்கு பால், மஞ்சள், விபூதி, சந்தனம், பஞ்சாமிா்தம், மலா் உள்ளிட்ட 21 வகை பொருள்களால் அபிஷேகம் நடைபெற்றது. இரவு குத்துவிளக்கு பூஜை நடைபெற்றது. இதில் திரளானோா் கலந்து கொண்டனா். விழாவுக்கான ஏற்பாடுகளை கடலாடி தேவா் மகாசபை, இளைஞரணியினா் செய்தனா்.