இலங்கைக்கு கடத்த முயன்ற 7.50 லட்சம் வலி நிவாரணி மாத்திரைகள் பறிமுதல்

இலங்கைக்கு கடத்துவதற்காக சரக்கு வாகனத்தில் கொண்டு வந்த ரூ.3 கோடி மதிப்பிலான 7.50 லட்சம் வலி நிவாரணி மாத்திரைகளை கடலோரப் பாதுகாப்புக் குழும போலீஸாா் வெள்ளிக்கிழமை பறிமுதல் செய்தனா். இதுதொடா்பாக இருவா் கைது செய்யப்பட்டனா்.

ராமநாதபுரம் மாவட்டம், மண்டபம் பகுதியில் கடலோரப் பாதுகாப்புக் குழும உதவி ஆய்வாளா் காளிதாஸ் தலைமையிலான போலீஸாா் கடலோரப் பகுதிகளில் கண்காணிப்புப் பணியில் ஈடுபட்டனா்.

அப்போது மண்டபம் நோக்கி விரைவாக வந்த சரக்கு வாகனத்தை நிறுத்தி சோதனையிட்ட போது, அதில் ரூ.3 கோடி மதிப்பிலான 7.50 லட்சம் வலி நிவாரணி மாத்திரைகள் இருப்பது தெரியவந்தது. இந்த வாகனத்தை போலீஸாா் மண்டபம் கடலோரப் பாதுகாப்பு குழும காவல் நிலையத்துக்கு கொண்டு சென்றனா். இதுதொடா்பாக வழக்குப் பதிவு செய்த போலீஸாா் இந்த வாகனத்தை ஓட்டி வந்த நாகேஸ்வரன் உள்பட இருவரைக் கைது செய்தனா். அவா்களிடம் நடத்திய விசாரணையில் இலங்கைக்கு கடத்துவதற்காக மாத்திரைகளை சரக்கு வாகனத்தில் கொண்டு வந்ததாகத் தெரிவித்தனா்.

இதையடுத்து, மண்டபத்தில் உள்ள சுங்கத் துறை அதிகாரிகளிடம் மாத்திரைகளையும், சரக்கு வாகனத்துடன், இவா்கள் இருவரையும் ஒப்படைத்தனா்.

இதேபோல, வியாழக்கிழமை இரவு வேதாளை கடற்கரையில் பதுக்கி வைத்திருந்த 286 கிலோ பீடி இலைகளை கடலோரப் பாதுகாப்புக் குழும போலீஸாா் பறிமுதல் செய்தனா். இதுகுறித்து வழக்குப் பதிவு செய்து விசாரணை நடத்தி வருகின்றனா்.