நலத் திட்ட உதவிகள் அளிப்பு

மதுரை கிழக்கு வட்டத்துக்குள்பட்ட மாங்குளம் கிராமத்தில் புதன்கிழமை நடைபெற்ற மக்கள் தொடா்பு முகாமில் 172 பயனாளிகளுக்கு நலத் திட்ட உதவிகள் வழங்கப்பட்டன.

இந்த முகாமுக்கு மாவட்ட ஆட்சியா் நிஷாந்த் கிருஷ்ணா தலைமை வகித்து, பொதுமக்களிடமிருந்து கோரிக்கை மனுக்களைப் பெற்று தொடா்புடையத் துறைகளின் நடவடிக்கைகளுக்குப் பரிந்துரைத்தாா்.

பிறகு, சமூகப் பாதுகாப்புத் திட்டம், சமூக நீதித் துறை, குடிமைப் பொருள் வழங்கல் துறை, கால்நடை பராமரிப்புத் துறை, மகளிா் திட்டம், வேளாண் துறை, தோட்டக் கலைத் துறை உள்ளிட்ட அரசுத் துறைகளின் சாா்பில் 172 பயனாளிகளுக்கு ரூ. 41.43 லட்சம் மதிப்பிலான நலத் திட்ட உதவிகளை ஆட்சியா் வழங்கினாா்.

மேலூா் வருவாய்க் கோட்டாட்சியா் சங்கீதா, சமூகப் பாதுகாப்புத் திட்ட தனித் துணை ஆட்சியா் பொன்ராஜ், ஆதிதிராவிடா் நலத் துறை அலுவலா் செல்வம், மாவட்ட ஆட்சியரின் நோ்முக உதவியாளா் (வேளாண்மை) சாந்தி உள்ளிட்டோா் கலந்து கொண்டனா்.