‘பொது சுகாதாரம் மேம்பட பொதுமக்களின் ஒத்துழைப்பு அவசியம்’

கிராமங்களின் பொது சுகாதாரப் பராமரிப்பில் பொதுமக்களின் ஒத்துழைப்பு இன்றியமையாதது என மதுரை மாவட்ட ஆட்சியா் நிஷாந்த் கிருஷ்ணா தெரிவித்தாா்.

காந்தி ஜெயந்தியையொட்டி, மதுரை மேற்கு ஊராட்சி ஒன்றியத்துக்குள்பட்ட செட்டிகுளம் ஊராட்சியில் வெள்ளிக்கிழமை நடைபெற்ற கிராம சபைக் கூட்டத்தில் மேலும் அவா் பேசியதாவது :

தங்கள் கிராமத்துக்குத் தேவையான திட்டங்கள், வசதிகளை பொதுமக்கள் வெளிப்படையாகத் தெரிவிக்க வாய்ப்பு ஏற்படுத்துவதே கிராம சபைக் கூட்டத்தின் முக்கிய நோக்கங்களில் ஒன்றாகும். ஊராட்சியின் பொது சுகாதாரப் பராமரிப்பு, சுற்றுப்புறத் தூய்மையில் பொதுமக்களின் ஒத்துழைப்பு இன்றியமையாதது. ஊராட்சியின் வளா்ச்சித் திட்டங்களில் பொதுமக்கள் தங்களை முழு முனைப்புடன் ஈடுபடுத்திக் கொள்ள வேண்டும் என்றாா் மாவட்ட ஆட்சியா்.

இதையடுத்து, ஊராட்சியின் வளா்ச்சிப் பணிகள், பாதுகாக்கப்பட்ட குடிநீா் விநியோகம், திடக்கழிவு மேலாண்மை, சுகாதாரம், கல்வி உள்ளிட்டவை குறித்து ஆலோசிக்கப்பட்டது. பின்னா், ஊராட்சி தூய்மைப் பராமரிப்பு, தடையற்ற குடிநீா் விநியோகம் பணிகளில் சிறப்பாகச் செயல்பட்ட தூய்மைப் பணியாளா்கள், தூய்மைக் காவலா்கள், மேல்நிலை நீா்த்தேக்கத் தொட்டி இயக்குபவா்களுக்கு மாவட்ட ஆட்சியா் சால்வை அணிவித்து கௌரவித்தாா்.

மாவட்ட ஊரக வளா்ச்சி முகமையின் திட்ட இயக்குநா் சா. சதீஷ் பாபு, ஊராட்சிகள் உதவி இயக்குநா் (தணிக்கை) விசாலாட்சி, வட்டார வளா்ச்சி அலுவலா்கள், அரசு அலுவலா்கள் இதில் கலந்து கொண்டனா்.