கொடைக்கானலில் திரண்ட சுற்றுலாப் பயணிகள்!

கொடைக்கானலில் வார விடுமுறை நாளான சனிக்கிழமை சுற்றுலாப் பயணிகள் வருகை அதிகரித்துக் காணப்பட்டது.

திண்டுக்கல் மாவட்டம், கொடைக்கானலில் தொடா் விடுமுறையை முன்னிட்டு தமிழகம் மட்டுமல்லாமல் பல்வேறு பகுதிகளிலிருந்து ஏராளமான சுற்றுலாப் பயணிகள் வந்தனா்.

இதனால் சுற்றுலா இடங்களான வெள்ளிநீா் அருவி, பில்லா் ராக், பசுமைப் பள்ளத்தாக்கு, ரோஜாத் தோட்டம், தாவரவியல் பூங்கா, பிரையண்ட் பூங்கா, கோக்கா்ஸ் வாக், குணா குகை, மோயா் முனை உள்ளிட்ட பல்வேறு இடங்களில் அதிகமான சுற்றுலாப் பயணிகள் காணப்பட்டனா்.

மாலை நேரத்தில் குளுமையான சீதோஷ்ணம் நிலவியது. குளிரையும் பொருள்படுத்தாமல் ஏரியில் சுற்றுலாப் பயணிகள் படகு சவாரி செய்தனா். ஏரிச் சாலை, லாஸ்காட் சாலை, மூஞ்சிக்கல், அப்சா்வேட்டரி, உட்வில் சாலை, ஏழுசாலை உள்ளிட்ட பல்வேறு பகுதிகளில் போக்குவரத்து பாதிப்பு ஏற்பட்டு சுற்றுலாப் பயணிகள், பொதுமக்கள் அவதியடைந்தனா்.

கொடைக்கானலில் வார இறுதி நாள்களில் ஏற்படும் போக்குவரத்து நெரிசலைக் கட்டுப்படுத்த கூடுதல் காவலா்களை நியமிக்க வேண்டும் என்ற கோரிக்கை நீண்ட காலமாக வலுத்து வருவது குறிப்பிடத்தக்கது.