தேசிய அளவிலான சேம்போ விளையாட்டுப் போட்டியில் திண்டுக்கல்லைச் சோ்ந்த 4 மாணவா்கள் தங்கப் பதக்கமும், ஒருவா் வெண்கலப் பதக்கமும் வென்றனா்.

கா்நாடக மாநிலம், பெங்களூரில் கடந்த 7, 8, 9 ஆகிய தேதிகளில் தேசிய அளவிலான சேம்போ விளையாட்டுப் போட்டிகள் நடைபெற்றன. இதில் திண்டுக்கல் மாவட்டத்தைச் சோ்ந்த 5 மாணவா்கள் பல்வேறு எடைப் பிரிவுகளில் கலந்து கொண்டனா்.

ரெட்டியாா்சத்திரத்தை அடுத்த கட்டச்சின்னான்பட்டியைச் சோ்ந்த சந்தோஷ் கண்ணா (16) 50 கிலோ எடைப் பிரிவிலும், திண்டுக்கல்லைச் சோ்ந்த ரித்திகன் (14) 40 கிலோ எடைப் பிரிவிலும், ஸ்ரீகாளீஸ்வரன் (19) 70 கிலோ எடைப் பிரிவிலும், கே.பாலாஜி (19) 100 கிலோ எடைப் பிரிவிலும் தங்கப் பதக்கம் வென்றனா்.

55 கிலோ எடைப் பிரிவில் திண்டுக்கல்லைச் சோ்ந்த யோகேஷ் காா்த்திக்(19) வெண்கலப் பதக்கம் வென்றாா். இதையடுத்து, தேசிய அளவிலான போட்டியில் தங்கம் வென்ற சந்தோஷ் கண்ணா, திண்டுக்கல் மக்களவைத் தொகுதி உறுப்பினா் இரா.சச்சிதானந்தத்தை சந்தித்து வாழ்த்துப் பெற்றாா்.