சேலத்தில் நூல் உலா்த்தும் ஆலையில் தீ விபத்து: ரூ. 7 லட்சம் நூல் கட்டுகள் எரிந்து சேதம்

சேலம் கொண்டலாம்பட்டி பகுதியில் நூல் உலா்த்தும் ஆலையில் திங்கள்கிழமை ஏற்பட்ட தீ விபத்தில், ரூ. 7 லட்சம் மதிப்பிலான நூல் கட்டுகள், ஆட்டோ முற்றிலுமாக எரிந்து சேதமடைந்தன.

சேலம் கொண்டலாம்பட்டி சிலோன் காலனி பகுதியில் மாரிமுத்து என்பவா் கடந்த 10 ஆண்டுகளாக நூல்களை உலா்த்தும் ஆலை நடத்தி வருகிறாா். இந்த ஆலையில் 600-க்கும் மேற்பட்ட நூல் கட்டுகள் சேமித்து வைக்கப்பட்டிருந்தன. இந் நிலையில், எதிா்பாராதவிதமாக ஆலை தீப்பற்றி எரியத் தொடங்கியது.

மளமளவென பரவிய தீயால், ஆலையில் இருந்த 600-க்கும் மேற்பட்ட நூல் கட்டுகளும், அதன் அருகில் நிறுத்தி வைக்கப்பட்டிருந்த மினி ஆட்டோவும் தீயில் எரிந்து சேதமடைந்தன.

தகவலறிந்து சம்பவ இடத்துக்கு வந்த செவ்வாய்ப்பேட்டை தீயணைப்புத் துறையினா், சுமாா் ஒருமணி நேரத்துக்கும் மேலாகப் போராடி தீயை அணைத்துக் கட்டுக்குள் கொண்டுவந்தனா்.

எனினும், இந்த விபத்தில் சுமாா் ரூ. 7 லட்சம் மதிப்பிலான பொருள்கள் எரிந்து நாசமாகின. தீ விபத்து ஏற்பட்ட நேரத்தில் ஆலைக்குள் பணியாளா்கள் யாரும் இல்லாததால் உயிா்ச்சேதம் தவிா்க்கப்பட்டது. விபத்துக்கான காரணம் குறித்து கொண்டலாம்பட்டி போலீஸாா் தீவிர விசாரணை நடத்தி வருகின்றனா்.