சேலம் வழியாக கேரளம் சென்ற ரயிலில் 4.5 கிலோ கஞ்சா பறிமுதல்

சேலம் வழியாக கேரளம் சென்ற ரயிலில் கடத்திவரப்பட்ட 4.5 கிலோ கஞ்சாவை போலீஸாா் செவ்வாய்க்கிழமை பறிமுதல் செய்தனா்.

ஒடிசா, ஆந்திரத்தில் இருந்து சேலம் வழியாக செல்லும் ரயில்களில் கஞ்சா கடத்தப்படுவதை தடுக்க சேலம் ரயில்வே போலீஸாரும், சேலம் போதைப் பொருள் கடத்தல் தடுப்புப் பிரிவு போலீஸாரும் இணைந்து தொடா் சோதனை நடத்தி வருகின்றனா்.

அந்த வகையில், ஆந்திர மாநிலம், செகந்திரபாத்தில் இருந்து சேலம் வழியாக கேரள மாநிலம், திருவனந்தபுரம் செல்லும் சபரி விரைவு ரயிலில் ரயில்வே போலீஸாா் செவ்வாய்க்கிழமை காலை சோதனையில் ஈடுபட்டனா்.

அதில், முன்புறம் உள்ள முன்பதிவில்லா பெட்டியில் கேட்பாரற்றுக் கிடந்த பையில் 5 பொட்டலங்கள் கிடந்தன. அதை திறந்து பாா்த்தபோது, 4.5 கிலோ கஞ்சா இருந்தது தெரியவந்தது. அவற்றைப் பறிமுதல் செய்து, கஞ்சா கடத்தி வந்த மா்ம நபா்கள் குறித்து பயணிகளிடம் விசாரணை நடத்தினா். அதில், போலீஸாரைக் கண்டதும் பையை போட்டுவிட்டு மா்ம நபா்கள் தப்பிச் சென்றது தெரியவந்தது.

இதைத் தொடா்ந்து, சிக்கிய 4.5 கிலோ கஞ்சாவையும் தனிப்படையினா் சேலம் ரயில்வே போலீஸில் ஒப்படைத்தனா்.