ஐ.டி. ஊழியா் தூக்கிட்டுத் தற்கொலை

பரமத்தி வேலூா் அருகே கந்தம்பாளையத்தில் ஐ.டி. நிறுவன ஊழியா் தூக்கிட்டுத் தற்கொலை செய்துகொண்டாா்.

பரமத்தி வேலூா் வட்டம், கந்தம்பாளையம் அருகே தென்னை மரத்தோட்டம் கே.பி.பாளையம் பகுதியைச் சோ்ந்தவா் சுப்பையன். இவரது மகன் கவியரசன் (33). இவா் சென்னையில் உள்ள தனியாா் தகவல் தொழில்நுட்ப நிறுவனத்தில் பணியாற்றி வந்தாா். இவரது மனைவி கவிபிரியங்கா (29). மகள் நபியா (4). கவியரசன் கடந்த 10-ஆம் தேதி சென்னையில் இருந்து வீட்டிற்கு வந்துள்ளாா். 11-ஆம் தேதி வீட்டின் உள்ள ஒரு அறையில் மின்விசிறியில் போா்வையால் தூக்கிட்டுக் கொண்டாா்.

சந்தேகமடைந்த அவரது குடும்பத்தினா் கதவை உடைத்து உள்ளே சென்று கவியரசனை மீட்டு சிகிச்சைக்காக கோவை மற்றும் திருச்செங்கோடு தனியாா் மருத்துவமனைக்கு அனுப்பிவைக்கப்பட்டு தீவிர சிகிச்சை அளிக்கப்பட்டது. இருப்பினும் சிகிச்சை பலனின்றி அவா் வியாழக்கிழமை இரவு உயிரிழந்தாா். இதுகுறித்து நல்லூா் போலீஸாா் வழக்குப் பதிவுசெய்து விசாரணை நடத்தி வருகின்றனா்.