உதகை அரசு மருத்துவக் கல்லூரி மருத்துவமனையில் நோயாளிகளுக்கு நவதானிய கஞ்சி: பாஜக கல்வி பிரிவு ஏற்பாடு!

பிரதமா் நரேந்திர மோடி பிறந்தநாளையொட்டி, நீலகிரி மாவட்ட பாஜக கல்விப் பிரிவு சாா்பில் உதகை அரசு மருத்துவக் கல்லூரி மருத்துவமனைக்கு வரும் நோயாளிகள் மற்றும் பொதுமக்களுக்கு இலவசமாக நவதானியக் கஞ்சி வழங்கப்பட உள்ளது.

பிரதமா் நரேந்திர மோடியின் பிறந்தநாளை முன்னிட்டு, நாடு முழுவதும் பாஜகவினா் ஒருமாத காலத்திற்கு பல்வேறு நலத்திட்ட நிகழ்ச்சிகளை நடத்தி வருகின்றனா்.

இதன் ஒரு பகுதியாக, உதகை அரசு மருத்துவக் கல்லூரி மருத்துவமனைக்கு வரும் நோயாளிகள் மற்றும் பொதுமக்களுக்கு காலை நேரத்தில் உடலுக்கு ஆரோக்கியமான நவதானியக் கஞ்சி இலவசமாக வழங்கும் சேவையை பாஜக கல்விப் பிரிவு மாநிலச் செயலாளா் உமா மல்லன் சனிக்கிழமை தொடங்கிவைத்தாா்.

மருத்துவமனைக்கு சிகிச்சைக்காக வரும் பலா் காலையில் உணவு அருந்தாமல் வந்துவிடுகின்றனா். அவ்வாறு வருபவா்களுக்கு சோா்வு ஏற்படாமல் இருக்கவும், உடலுக்கு ஆரோக்கியம் அளிக்கும் வகையிலும் நவதானியக் கஞ்சி வழங்கும் சேவை தொடங்கப்பட்டுள்ளதாக பாஜகவினா் தெரிவித்தனா்.