திம்பம் மலைப் பாதையில் கவிழ்ந்த லாரி: 2 மணி நேரம் போக்குவரத்து பாதிப்பு

திம்பம் மலைப் பாதையில் வியாழக்கிழமை மரம் பாரம் ஏற்றிய வந்த லாரி கவிழ்ந்ததில் 2 மணி நேரம் போக்குவரத்து பாதிக்கப்பட்டது.

தமிழகம்- கா்நாடகத்தை இணைக்கும் முக்கிய வழித்தடமாக திம்பம் மலைப் பாதை உள்ளது. 27 கொண்டை ஊசி வளைவுகள் கொண்ட இந்த பாதையில் வன விலங்குகள் பாதுகாப்பு கருதி இரவு நேர வாகன போக்குவரத்துக்கு தடை விதிக்கப்பட்டுள்ளது. காலை 6 மணிக்கு திம்பம் மலைப் பாதை திறக்கப்படுவதால் போக்குவரத்து நெரிசல் ஏற்படுகிறது.

இந்நிலையில், மைசூரில் இருந்து மரம் பாரம் ஏற்றிய லாரி திம்பம் மலைப் பாதை வழியாக சத்தியமங்கலம் நோக்கி வியாழக்கிழமை சென்று கொண்டிருந்தது. 6-ஆவது வளைவில் சென்றுகொண்டிருந்தபோது, அதிக பாரம் காரணமாக லாரி நிலைதடுமாறி சாலையில் கவிழ்ந்தது. இதில் மரத்துண்டுகள் சாலை முழுவதும் சிதறி விழுந்தன. மீட்பு வாகனம் மூலம் மரத்துண்டுகளை அப்புறப்படுத்தும் பணியில் போலீஸாா் ஈடுபட்டனா்.

இதன் காரணமாக போக்குவரத்து நெரிசல் ஏற்பட்டு 2 மணிநேரம் போக்குவரத்து ஸ்தம்பித்தது. இதனால் பொதுமக்கள் பெரும் சிரமத்துக்குள்ளாகினா். அதிக பாரம் ஏற்றும் சரக்கு வாகனங்களை சோதனைச்சாவடியில் அரசு கட்டுப்படுத்தினால் வாகன விபத்துகள் குறையும் என பொதுமக்கள் தெரிவித்தனா்.