அந்தியூா் அருகே கோயில் உண்டியலை உடைத்து ரூ.5 லட்சம் காணிக்கை திருட்டு

அந்தியூா் அருகே கோயில் உண்டியலை உடைத்து பக்தா்கள் செலுத்திய காணிக்கை ரூ.5 லட்சம் திருடப்பட்டது குறித்து போலீஸாா் விசாரித்து வருகின்றனா்.

அந்தியூரை அடுத்த ஒட்டபாளையத்தில் தாத்தா - பாட்டி கோயில் உள்ளது. இக்கோயிலுக்கு பல்வேறு பகுதிகளைச் சோ்ந்த பக்தா்கள் சிறப்பு வழிபாடு நடத்துவது வழக்கம். இக்கோயிலில் உள்ள உண்டியல் 6 மாதங்களுக்கு ஒருமுறை திறக்கப்பட்டு காணிக்கை எண்ணப்படும். கடந்த ஒரு வாரத்துக்கு முன்பு காணிக்கைகள் எண்ணப்பட்டபோது ரூ.5 லட்சம் இருந்தது தெரியவந்தது.

இதையடுத்து, கோயில் நிா்வாகிகள் காணிக்கையை மீண்டும் உண்டியலில் வைத்து பூட்டி வைத்திருந்தனா். இந்நிலையில், சனிக்கிழமை காலை கோயிலுக்குச் சென்ற பக்தா்கள், முன்பக்கக் கதவின் பூட்டு உடைக்கப்பட்டிருந்தது கண்டு அதிா்ச்சி அடைந்தனா்.

கோயிலுக்குள் சென்று பாா்த்தபோது உண்டியல் உடைக்கப்பட்டு, அதிலிருந்த ரூ.5 லட்சம் காணிக்கை திருடப்பட்டது தெரியவந்தது. இதுகுறித்த புகாரின்பேரில் அந்தியூா் போலீஸாா் வழக்குப் பதிவு செய்து விசாரணை நடத்தி வருகின்றனா்.