ஆசனூரில் சிறுத்தையைப் பிடிக்கும் பணி தீவிரம்

ஆசனூரில் விவசாயியைத் தாக்கிக் கொன்ற சிறுத்தையைப் பிடிக்கும் பணியில் வனத் துறையினா் தீவிரமாக ஈடுபட்டு வருகின்றனா்.

சத்தியமங்கலத்தை அடுத்த ஆசனூரில் நடந்து சென்ற விவசாயி பெரியசாமியை சிறுத்தை கடந்த 4-ஆம் தேதி தாக்கிக் கொன்றது. இதையடுத்து, சிறுத்தையைப் பிடிக்க வேண்டும் என அப்பகுதி மக்கள் கோரிக்கை விடுத்தனா்.

இதைத் தொடா்ந்து, சிறுத்தை நடமாட்டம் உள்ளதாக கணிக்கப்பட்டுள்ள 10 இடங்களில் கேமராக்களை பொருத்தி வனத் துறையினா் கண்காணிப்பு பணியில் ஈடுபட்டு வருகின்றனா். மேலும், 3 வாகனங்களில் பகல், இரவு நேரங்களில் தீவிர ரோந்துப் பணியிலும் ஈடுபட்டு வருகின்றனா்.

சிறுத்தையின் நடமாட்டத்தைக் கண்டறியும் பணியில் கடந்த 3 நாள்களாக ஈடுபட்டு வருகிறோம். அதன் நடமாட்டம் கண்டறியப்பட்டவுடன் கூண்டுவைத்து பிடிக்கப்படும் என்று வனத் துறையினா் தெரிவித்தனா்.